जुम्ल्याहा सन्तानसँगै अस्ताइन् संगीता, पति भन्छन्- चुनाव आयोग हत्यारा हो

काठमाडौं – चार महिनाकी गर्भवती थिइन् संगीता। उनको पेटमा जुम्ल्याहा सन्तान हुर्किरहेका थिए। तर, कोरोना भाइरसका कारण न उनी बाँचिन्, न सन्तानले संसार देख्न पाए।

भारतको श्रीवास्तव जिल्लास्थित डिगरा प्राथमिक विद्यालयकी शिक्षिका हुन् संगीता सिंह। संंगीताका पति शशांकले सरकार र चुनाव आयोगलाई संगीताको प्राण हरण गरेको आरोप लगाएका छन्। कारण– गर्भवती महिलालाई कोरोना संक्रमणको खतरा बढी हुने थाहा हुँदाहुँदै चुनावमा खटाइयो।

संगीतालाई सन्चो थिएन। तैपनि उनलाई पञ्चायतको चुनावमा काम गर्नैपर्छ भनेर दबाब दिइयो। श्रीमतीलाई  चुनावमा ड्युटी नराख्न शशांकले अनेक बिन्ति गरे। सरकारी अधिकारी गुहारे तर पनि केही लागेन।

चुनावको अघिल्लो दिन भारी मनका साथ संगीतालाई लिएर उनी मतदानस्थल पुगे। अधिकारीहरुले सहानुभूति दिनुको सट्टा उल्टै चुनावमा ड्युटी नगरे संगीताको जागिर खाइदिने र मुद्दा लगाउने धम्की दिए।

श्रीमतीको श्वासप्रश्वासमा समस्या आएकाले ड्युटी कटाइमाग्न शशांकले रातदिन दौडधुप गरे, अधिकारीहरुसँग बिन्ति बिसाए, तर उनीहरुले मानेनन्।
‘मैले जति प्रयास गर्दा पनि श्रीमती र गर्भमा हुर्किरहेका दुई सन्तानलाई बचाउन सकिन। सरकार र चुनाव आयोग  हत्यारा हो,’ शशांकले भनेका छन्।

शशांकले आफू अन्यायमा परेकोले गर्दै सरकार र चुनाव आयोगले मृत्युको जिम्मेवारी लिनुपर्ने बताएका छन्। 

चुनावको बन्द प्रशिक्षणपछि संगीतालाई ज्वरो आयो। उनले कोरोना परीक्षण गराइन्। सुरुमा एन्टिजेन परीक्षण गर्दा रिपोर्ट नेगेटिभ आयो। पीसीआरमा भने संक्रमण रहेको पुष्टि भयो।

रिपोर्ट आउनुअघि नै संगीताको स्वास्थ्य अवस्था बिग्रिसकेको थियो। डाक्टरको सल्लाहअनुसार उनी औषधी सेवन गरिरहेकी थिइन्। उनलाई सास फेर्न समस्या भइरहेको थियो। चुनावको एक दिनअघि संगीता सकीनसकी शशांकसँग मतदानस्थल पुगिन्। आफ्नो अवस्था देखेर आयोगले आफूलाई बिदा दिन्छ भन्ने सोचेकी थिइन् उनले। तर, आयोगका मानिसले उनको कुरा सुन्नुको साटो काम नगरे मुद्दा चलाइदिने धम्की दिए। आयोगका अधिकारीहरुसँग बिन्ति बिसाए पनि उनीहरुको कुरा कसैले सुनेन।

बिदा पाउने नदेखेपछि मुद्दाको परवाह नगरी शशांकले संगीतालाई उपचारका लागि लखनउ लगे। त्यही साँझ उनीहरु अस्पताल पुगे, तर अस्पतालमा ठाउँ पाइएन। सास फेर्न समस्या भएकी संगीताले बिना अक्सिजन र बिना बेड घण्टौं कुर्नुपर्‍यो।

२४ घण्टापछि बल्ल चिनहटस्थित एक निजी अस्पतालमा बेड पाए। संगीताको अक्सिजन लेभल नाजुक भएको भन्दै उनलाई सफेदाबादस्थित मेयो अस्पतालमा रिफर गरियो। 

मेयो अस्पताल पुग्दा उनको अक्सिजन लेभल ३७ पुगिसकेको थियो। अस्पताल पुगेको केही घण्टामै संगीताले प्राण त्यागिन्।

केही वर्षको प्रेम सम्बन्धपछि अघिल्लो वर्षको जुन महिनामा संगीता र शशांक विवाह बन्धनमा बाँधिएका थिए। तर एक वर्ष नपुग्दै शशांक एक्ला भएका छन्। उनको संसार उजाडिएको छ। 

चार महिनाअघि संगीता गर्भवती भएको थाहा भएको थियो। डाक्टरले संगीताको गर्भमा जुम्ल्याहा बच्चा हुर्किरहेका भन्दै स्वास्थ्यको ख्याल गर्न भनेका थिए। ६ वर्षअघि बीएड गरेपछि संगीताले सहायक प्राध्यापकमा नाम निकालेकी थिइन्। उनीहरुले खुसी परिवारको परिकल्पनासँगै सुन्दर घरबारको सपना पालेका थिए। ‘हामी १० महिनामात्रै एकसाथ रह्यौं। यति छिट्टै जिन्दगी सकिन्छ भन्ने सोचेकै थिइनँ,’ शशांक सुस्केरा हाल्छन्, ‘हामी सुख–दुःखका साथी थियौं, एक अर्कालाई हेरेर बाँच्ने प्रण थियो। अब म कसरी बाँच्ने, मेरो के नै रह्यो र संसारमा ? सरकार र चुनाव आयोगले मेरो संसार उजाड्यो। चुनाव आयोग हत्यारा आयोग बन्यो।’

चुनावको बन्दसत्रमा आयोगले कुनै पनि स्वास्थ्य मापदण्डको पालना नगरेको उनले बताए। बन्दसत्रका क्रममा एक जना शिक्षिकामा कोरोना संक्रमण रहेको पाइए पनि कुनै सतर्कता नअपनाइएको शशांकले बताएका छन्।

संगीता स्कुल पढाउँथिन् भने शशांक लोकसेवाको तयारी गरिरहेका थिए। ‘घरमा खुसीको माहोल छाइरहेको थियो। मेरो सारा खुसी लुटियो, म बर्बाद भएँ,’ शशांक भक्कानिन्छन्, ‘मेरो श्रीमती र दुई बच्चाको हत्याको जिम्मेवारी सरकार र निर्वाचन आयोगले लिनुपर्छ।’

प्राथमिक शिक्षक संघले चुनावमा खटिएका ७ सयभन्दा बढी शिक्षक कर्मचारीको कोरोना संक्रमणबाट मृत्यु भएको जानकारी दिएको छ। संगीतासँगै चुनावमा खटिएकी अर्की शिक्षिका समीक्षा जयसवालको पनि संक्रमणका कारण ज्यान गएको छ। –द वायरबाट