अखबारः बलात्कारको डरलाग्दो तथ्याङ्क, फास्ट ट्रयाकमा ऋण

काठमाडौं- राजधानीबाट प्रकाशित बिहीबारका राष्ट्रिय दैनिक पत्रिकाहरुले फरक फरक विषयलाई प्राथमिकतामा पारेका छन् । 

कसैले बर्षेनी बलात्कारका घटना बढेको विषयलाई पहिलो खबर बनाएका छन् भने कसैले फास्ट ट्रयाक ऋणमा बनाउन लागेको विषयलाई मुख्य समाचार बनाएका छन् । आरक्षण अब ८ क्लस्टरमा हुने, दलहरुबीच साझा सहमती नहुँदा नेपालको कुटनीति कमजोर बनेको लगायतका विषयलाई पनि आजका पत्रपत्रिकाले महत्वका साथ पहिलो पृष्ठमा छापेका छन् । 

फास्ट ट्रयाकमा ऋण

कान्तिपुर दैनिकमा प्रकाशित यो खबर अनुसार स्वदेशी लगानीमै बनाउने भन्दै सुरु गरिएको तराई–मधेस द्रुतमार्ग (फास्ट ट्रयाक) मा सरकारले विश्व बैंकको ऋण प्रयोग गर्ने भएको छ । 

७६.२ किमि लामो फास्ट ट्रयाक बनाउन आन्तरिक स्रोतको अभाव हुनुका साथै आगामी वर्षबाट निर्माणका लागि उल्लेख्यबजेट आवाश्यक पर्ने भएपछि सरकारले  विश्व बैंकको ऋण लिन लागेको हो । आगामी वर्ष ९ अर्ब ७५ करोड रुपैयाँ ऋण रकम प्रयोग गरिनेछ ।
 
वर्षेनी बढिरहेछ बलात्कार

अन्नपूर्ण पोस्ट्ले मुख्य समाचारका रुपमा प्रकाशित गरेको यो खबर अनुसार २० वर्षमा झन्डै ६ गुणाले बलात्कारका घटना बढेको पाइएको छ । दुई दशकअघि देशभर करिब २ सय बलात्कारका घटना हुने गरेकोमा पछिल्लो एक वर्षमा मात्रै झन्डै १ हजार २ सय घटना भएका छन् । 

आरक्षण अब ८ क्लस्टरमा

सरकारले संघीय निजामती प्रशासनमा ८ क्लस्टरलाई ४५ प्रतिशत सिट आरक्षण गर्ने प्रस्ताव गरेको छ । यसअघि सरकारले ५ क्लस्टरलाई ४५ प्रतिशत सिटमा आरक्षण दिदै आएको थियो । 

कान्तिपुरमा प्रकाशित खबर अनुसार अब आरक्षित सिटको ५० प्रतिशत महिलालाई दिइने छ भने विपन्न खस आर्यलाई समेत आरक्षण दिइने गरि प्रस्ताव गरिएको छ ।