जनकपुरधाम- भारतीय प्रधानमन्त्री नरेन्द्र मोदीको जनकपुर भ्रमणमा भएको खर्चका विषयमा प्रश्च उठेपछि प्रदेश २ का भौतिक पूर्वाधार मन्त्री जितेन्द्र सोनल पत्रकार विरुद्धै खनिएका छन् ।
मोदी भ्रमणको एक महिना बित्दापनि खर्च विवरण सार्वजनिक गर्न नसकेको प्रदेश सरकारका मन्त्री सोनलले सोमबार प्रदेशसभा बैठकमा बोल्दै सञ्चारकर्मीले अनर्गल आरोप लगाएको बताए ।
राजपा संसदीय दलका नेता समेत रहेका मन्त्री सोनलले संसदको शुन्य समयमा बोल्दै भ्रष्टाचार भएको प्रमाणित गरेर देखाउन चुनौती दिए ।
‘लोकतान्त्रिक मूल्य मान्यता अनुसार स्वतन्त्र पत्रकारिताको म सम्मान गर्दछु,’ सोनलले भने, ‘म पत्रकारलाई उँट बनेको देख्न चाहेको छु, तर तपाईंहरु खँसी बाख्रा बन्नुभएको छ ।’
मोदी भ्रमणको खर्च तथा संघीय समाजवादी फोरम केन्द्र सरकारमा गएपछि प्रदेश सरकार र मन्त्रीलाई गलत लान्छना लाउने गरेको आरोप लगाए ।
प्रदेश सरकार गठन भए पश्चात आफूहरुमाथि निरन्तर आक्रमण भइरेहेको आरोप लगाउँदै मन्त्री सोनलले भने, ‘अढाई हजारको गाडी भाडा गरेर शपथ ग्रहण बीरगंजबाट जनकपुर आएको थिएँ । र, सरकारबाट हटेपछि फेरी उत्तिकै भाडाको गाडीबाट बीरगञ्ज फर्कने छु । मोदी भ्रमणमा कहिँ कतै भ्रष्टाचार भएको छैन ।’
एक फरक प्रसंगमा मन्त्री सोनलले संघीय समाजवादी फोरमक नेकपा नेतृत्वको केन्द्र सरकारमा सहभागी हुँदैमा आफूहरुको गठबन्धनमा कुनै प्रभाव नपर्ने दावी गरे ।
भारतीय प्रधानमन्त्री नरेन्द्र मोदी जनकपुर भ्रमण गरेको एक महिना बिति सक्दापनि प्रदेश सरकारले खर्च विवरण सार्वजनिक गर्न सकेको छैन् । मोदीको नागरिक अभिनन्दन तथा स्वागतमा प्रदेश सरकारले ७ करोड २० लाख रुपैया खर्च गरेको बताइएको छ ।
प्रदेशसभामा बोल्दै प्रमुख विपक्षी दलका नेता तथा काँग्रेस संसदीय दलका नेता रामसरोज यादवले मोदी भ्रमणको क्रममा भएको खर्चको विषयमा सञ्चार माध्यमले उठाएको प्रश्नको प्रशंसा गरे । यादवले भने, ‘मोदीलाई स्वागत गर्न कहाँबाट कति पैसा आयो ? सदन र जनतालाई जानकारी नगराए सम्म पत्रकारले लेख्छन । यसमा आक्रोश व्यक्तगर्नुको कुनै तुक छैन ।’
खर्च विवरण नै सार्वजनिक नगरेपछि कसरी इमान्दार भन्ने प्रश्न गर्दै उनले खर्च विवरण सार्वजनिक गर्न आग्रह गरे ।
प्रकाशित: Dec 31, 2017| 18:23 आइतबार, पुस १६, २०७४