बुटवल- बुद्ध जन्मस्थल लुम्बिनीमा कोरोना महामारीपछि बुधबार सबैभन्दा धेरै पर्यटकले अवलोकन गरेका छन्।
नयाँ वर्ष मनाउन बिहानदेखि साँझसम्म लुम्बिनी घुम्नेहरूको घुइँचो लागेको थियो। मायादेवी मन्दिर दर्शनका लागि घण्टौँ लाइनमा बस्नुपरेको छ।
लुम्बिनी विकास कोषका सूचना अधिकृत राजन बस्नेतका अनुसार कोरोनापछि सबैभन्दा धेरै पर्यटक नयाँ वर्षको पहिलो दिन (बुधबार) लुम्बिनी पुगेका हुन्।
उनले एकै दिन १५ हजार अवलोकनकर्ता आएको बताए। कोरोनापछि गत वर्ष २०७६ चैत १० देखि २०७७ मंसिर ३ गतेसम्म लुम्बिनीमा पर्यटक भ्रमणका लागि रोक लगाइएको थियो।
मंसिर ३ गतेदेखि मायादेवी खुल्ला गरिएको थियो। सन् २०२१ को तीन महिनामा २ लाख ५६ हजार पर्यटकले अवलोकन गरेको लुम्बिनी विकास कोषले जनाएको छ।
नयाँ बर्षका दिन अवलोकनकर्ताको भिडले यातायात व्यवस्थापन गर्नसमेत केहीबेर समस्या भएको कोषले जनाएको छ।