क्लोप भन्छन्– लिभरपुलले रियललाई क्वार्टरफाइनल जित्न सजिलो बनाइदियो

काठमाडौं– इंग्लिस क्लब लिभरपुलका प्रशिक्षक योर्गेन क्लोपले लिभरपुलको मंगलबार रातिको प्रदर्शनका कारण रियललाई खेल जित्न सहज भएको बताएका छन्।

‘यदि तपाईं सेमिफाइनलमा पुग्न चाहनुहुन्छ भने तपाईंले त्यस्तै एट्याकिङ खेल्नुपर्ने हुन्छ,’ उनले पहिलो हाफमा रियलले गरेको प्रदर्शनबारे भने, ‘हामीले गएरातिको खेलमा त्यो काम गर्न सकेनौ। विषेशगरी पहिलो हाफमा।’

उनले थपे, ‘हामीले राम्रो खेल्न सकेनौँ। हामीले त्यस्तो खेल्न सकेनौँ जसले रियल मड्रिडमाथि दबाब बनाउन सकोस्। हामीले उनीहरुलाई पहिलो लेग जित्न सहज बनाइदियौँ।’

क्लोपको टिमले रियलमाथि एक मात्र गोल स्कोर गर्न सफल भएको थियो। त्यही गोललाई इंगित गर्दै क्लोपले भने, ‘हामीले खेलमा एकमात्र राम्रो कुरा गर्न सक्यौँ– त्यो हो सलाहको गोल। दोस्रो हाफको प्रदर्शन र गोल हाम्रा टिमको लाइफलाइन हो।’