काठमाडौं- ललितपुर मेयर कप टी–२० क्रिकेटअन्तर्गत मंगलबार सम्पन्न दोस्रो खेलमा प्रदेश १ ले सुदूरपश्चिमसँग ४० रनको हार बेहोरेको छ।
टस जितेर ब्याटिङ रोजेको सुदूरपश्चिमले पुरा ओभर खेल्दै चार विकेटको क्षतिमा १२९ रन बनाएको थियो। १३० रनको लक्ष्य पाएको प्रदेश १ ले १८ ओभर पाँच बलमा ८९ रन बनाउँदै सबै विकेट गुमाएपछि खेल सुदुरपश्चिमले जितेको हो।
सुदूरपश्चिमका लागि विन्दु रावलले ५२ रन बनाइन भने रेवती धामीले ३० रन बनाइन्। त्यस्तै, कविता जोशीले २१ रनको योगदान दिइन्।
प्रदेश १ की सबनम राईले दुई विकेट र ज्याति दनवारले एक विकेट गिराइन्। जवाफी ब्याटिङमा प्रदेश १ की कप्तान रुविना क्षेत्रीले २७ रन बनाइन भने अप्सरी बेगमले २२ रन बनाउनुबाहेक अन्य खेलाडीले सम्झनलायक प्रदर्शन गरेनन्।
सुदूरपश्चिमकी लक्ष्मी साउदले चार विकेट लिँदा कविता कुँवर र कविता जोशीले समान २–२ विकेट लिए। यो जितसँगै सुदूरपश्चिम प्रदेश फाइनल नजिक पुगेको छ। यता प्रदेश १ को फाइनलको यात्रा भने अन्य टिमको नजितामा भर पर्नु पर्ने भएको छ।