पुनरावलोकनका लागि माओवादी केन्द्रका अध्यक्षसहित नेताहरू सर्वोच्च जाँदै

काठमाडौं - फागुन २३ गते तत्कालीन नेकपा एमाले र माओवादी केन्द्रलाई पूर्ववत रुपमा फर्काउने सर्वोच्च अदालतको फैसलाविरुद्ध आज माओवादी केन्द्र सर्वोच्च अदालत जाँदैछ।

माओवादी केन्द्रका अध्यक्ष पुष्पकमल दाहालसहितका नेताहरू र कानुन व्यवसायीसहित पुनरावलोकनका लागि अहिले बिहान ११ बजे सर्वोच्च अदालत जान लागेका हुन्।

माओवादी केन्द्रका प्रमुख सचेतक देव गुरुङले पुनरावलोकनका लागि सर्वोच्च अदालत जान लागिएको जानकारी दिए।

सर्वोच्च अदालतको फैसलापछि माओवादी केन्द्रले पटक-पटक पुनरावलोकनमा जाने विषयमा कानुन व्यवसायीसँग छलफल गरेको थियो।

अध्यक्ष दाहालले पुनरावलोकनमा जानुअघि बिहान आफ्नै निवास खुमलटारमा आफू निकट केही स्थायी कमिटीका सदस्यसँग पनि छलफल गरेका थिए।