अर्थ

उपभोग्य वस्तुसम्बन्धी हटलाइनमा आईसीयू नपाएको गुनासो

1620141134.jpg

काठमाडौं-  वाणिज्य, आपूर्ति तथा उपभोक्ता संरक्षण विभागले दैनिक उपभोग्य वस्तुका सम्बन्धमा उपभोक्ताको गुनासो सुन्ने उद्देश्यले सञ्चालनमा ल्याएको हटलाइन नम्बर ११३७ मा आईसीयू नपाएको गुनासो आएको छ। विभागले सामान्य अवस्थामा समेत उपभोक्तालाई उजुरी गर्न सजिलो होस् भन्ने उद्देश्यले यसअघि नै सञ्चालनमा ल्याएको उक्त नम्बरमा कोरोना भाइरसका बिरामीका आफन्तले आईसीयू नपाएको गुनासो गरेका हुन्। 

गत वर्ष कोरोना भाइरस नियन्त्रणका लागि सरकारले गरेको लकडाउनका समयमा ग्यास नपाएको गुनासो आउने गरेकोमा यस वर्ष अधिकांश गुनासो कोभिडका विषयमा आउने गरेको विभागका शाखा अधिकृत रामहरि पोख्रेलले जानकारी दिए।

उनका अनुसार आइतबार मात्रै काठमाडौंकै एक बिरामीका आफन्तले ७५ वर्षीय बिरामीका लागि आईसीयू नपाएको गुनासो गरेका थिए। ‘कहिलेकाहीं आईसीयू पाइएको छैन भनेर पनि गुनासा आउने गरेका छन्’, पोख्रेलले भने, ‘दुई दिनअगाडि मात्रै हेल्पिङ ह्यान्डसमा ७५ वर्षीय बिरामी मान्छेका लागि आईसीयू नपाएको भन्दै फोन आएको थियो।’

आईसीयू नपाएको गुनासो आएपछि आफूले स्वास्थ्य मन्त्रालयले सूचनामा उल्लेख गरेको मोबाइल नम्बर र कोभिडका सम्बन्धमा जानकारी लिने हटलाइन नम्बर उपलब्ध गराएको पोख्रेलले बताए। पोख्रेलका अनुसार पछिल्लो समय विभागले सञ्चालनमा ल्याएको हटलाइन नम्बरमा दैनिक औसत ३० वटासम्म कल आउने गरेका छन्। तीमध्ये आधाभन्दा बढी कोभिडकै सम्बन्धमा हुन्छन्।

‘कोभिडका सम्बन्धमा २० वटासम्म पनि कल आउने गरेका छन्’, पोख्रेलले भने, ‘नजिकैको स्वास्थ्य संस्थामा जानुहोस्, जाँच गराउनुस् भनिदिन्छु। यस सम्बन्धमा बुझ्नको लागि ११३७ र १११५ हो भनेर पनि भन्ने गरेको छु।’

दैनिक उपभोग्य वस्तुसम्बन्धी गुनासा न्यून

दैनिक उपभोग्य वस्तुको बढी मूल्य, गुणस्तरमा शंका, कृत्रिम अभाव लगायतका विषयमा उपभोक्ताले उजुरी गरुन् भनेर विभागले हटलाइन नम्बर सुरु गरेको थियो। तर, अहिले दैनिक औसत ४ देखि ५ वटा कल सो सम्बन्धमा आउने गरेको विभागका अधिकारी बताउँछन्।

‘उपभोक्ताको कलमा पोहोरको जस्तो चाप छैन’, पोख्रेल भन्छन्, ‘पोहोर अहिलेको जस्तो समयमा खाना पकाउने ग्यासका गुनासा धेरै आएका थिए।’ पछिल्लो समय बजारमा दैनिक उपभोग्य वस्तुको मौज्दात पर्याप्त रहेकाले सो सम्बन्धमा हटलाइन नम्बरमा उपभोक्ताको गुनासो कम आउने गरेको विभागका प्रवक्ता शिवराज सेढाईंको भनाइ छ।

प्रवक्ता सेढाईंले ११३७ मा मूल्य र गुणस्तरका सम्बन्धमा आएका गुनासामा विभागले सकेसम्म तत्काल सम्बोधन गरिरहेको बताए। ‘मंगलबार पनि जोरपाटी क्षेत्रबाट रङ पसलको सम्बन्धमा गुनासो आएको थियो’, उनले भने, ‘अब विभागको टोली जोरपाटी क्षेत्रमा पुगेर अनुमगन गर्नेछ।’

प्रतिक्रिया दिनुहोस्