समाज

बैतडी जिप दुर्घटना : मृतकको संख्या ६ पुग्यो 

1606710669.png
सांकेतिक तस्बिर

धनगढी- बैतडीमा दिउँसो भएको जीप दुर्घटनामा ज्यान गुमाउनेको संख्या ६ पुगेको छ। दुर्घटनामा ४ जनाको घटनास्थल र दुई जनालाई उपचारको लागि अस्पताल लैजाँदै गर्दा मृत्यु भएको हो। 

जिल्ला प्रहरी कार्यालय बैतडीका प्रवक्ता प्रहरी निरीक्षक दर्शन खड्काका अनुसार दुर्घटनामा पञ्चेश्वर गाउँपालिका–६, रोडीदेवलका ५० वर्षीय जीतसिंह भण्डारी, ३० वर्षीय डम्मरसिंह भण्डारी, ४० वर्षीय दीपक भण्डारी, २७ वर्षीय हिम्मत भण्डारीको घटनास्थलमै मृत्यु भएको हो। जिप चालक तेजबहादुर बोहरा र ५० वर्षीय खेमसिंह भण्डारीको उपचारका लागि अस्पताल लैजाँदै गर्दा मृत्यु भएको उनले जानकारी दिए।

दुर्घटनामा सोही ठाउँका ३० वर्षीय हरीसिंह भण्डारी, २८ वर्षीय मदनसिंह भण्डारी, ३५ वर्षीय मोहनसिंह भण्डारी र २४ वर्षीय दिलिपसिंह भण्डारी घाइते भएको र उनीहरुलाई उपचारका लागि अस्पताल पठाइएको छ। 

से १ ज १२३ नम्बरको बोलेरो जिप पञ्चेश्वर गाउँपालिका–६ रोडीदेवलको गणमेश्वर मन्दिर नजिक मंगलबार दिउँसो दुर्घटना भएको हो। 

सोमबार साँझ परेको चट्याङ लागेर घटनास्थलमै मृत्यु भएका पञ्चेश्वर गाउँपालिका–६ का वडा सदस्य गोविन्दसिंह भण्डारीको शव पोस्टमार्टमका लागि जिल्ला अस्पताल बैतडी लैजाँदै गर्दा दुर्घटनामा परेको हव। जिपमा १० जना सवार थिए।

साँघुरो घुम्तीका कारण जिप दुर्घटना भएको हुनसक्ने प्रहरीको प्रारम्भिक अनुसन्धानले देखाएको छ। जिप सडकबाट झन्डै पाँच सय मिटर तल खसेको थियो।

प्रतिक्रिया दिनुहोस्