विराटनगर– इलामको माई नगरपालिका–१० लुम्बाकका दुर्गाप्रसाद तिम्सिना (दीपक जैशी) को उपचार प्रदेश सरकारले गरिदिने भएको छ। परिवारका धेरै सदस्यमा मानसिक समस्या भएको र आर्थिक अवस्था कमजोर भएका कारण उनको उपचारमा समस्या देखिएपछि प्रदेश सरकारले चासो लिएको हो।
आन्तरिक मामिला तथा कानुन एवं सामाजिक विकास मन्त्री हिक्मत कार्कीले तिम्सिनाको उपचार प्रदेश सरकारले गर्ने बताए। उनले इलामका प्रमुख जिल्ला अधिकारी ध्रुवबहादुर खड्कालाई तिम्सिनाको उपचारको व्यवस्था मिलाउन निर्देशन दिएका छन्।
कार्कीले तिम्सिनाको कहाँ लगेर कस्तो उपचार गर्नुपर्ने हो, त्यसको जानकारी लिन पनि निर्देशन दिएका छन्। मन्त्री कार्कीले दुर्गाप्रसादलाई क्षतिपूर्ति भराउन प्रदेश सरकारले पहल गर्ने बताए।
प्रमुख जिल्ला अधिकारी खड्काले तिम्सिनाका भाइ गोपाल शर्मालाई सम्पर्क गरी दुर्गाप्रसादको उपचार गराउने जानकारी दिएको बताए। प्रजिअ खड्काले भने, ‘दुर्गाको घरमा टोली पठाएर विवरण लिन निर्देशन दिएको छु।’
०३७ सालदेखि घरबाट बेपत्ता भएका उनी बिना सुनुवाइ ४० वर्ष भारतको जेलमा बसेर आइतबार फर्किएका थिए। व्यक्ति हत्या अभियोगमा उनलाई भारतको जेलमा राखिएको थियो।
२० वर्षको उमेरमा घरबाट हिँडेका उनी घर फर्किंदा मानसिक रुपमा बिरामी भएर फर्किएका छन्। चिकित्सकले दुर्गाप्रसादमा बालकले गर्ने व्यवहारमात्र रहेको बताएका छन्। निकै थोरै बोल्ने, काम्दै बोल्ने गरेको दुर्गाप्रसादका भाइ गोपाल शर्माले बताए। जेलले औषधि नपठाएका कारण उनले औषधि सेवन गर्न पाएका छैनन्।
भारतको कोलकाता उच्च अदालतले तिम्सिनालाई गत बुधबार जेलबाट रिहा गर्न आदेश दिएको थियो। आदेश अनुसार उनी शनिबार बिहान कोलकाताको दमदम जेलबाट छुटेका थिए।
४० वर्षसम्म बेपत्ता भएका उनको नागरिकता पनि बनेको छैन। धार्मिक परम्पराअनुसारका व्रतबन्ध र विवाह पनि भएको छैन। ८६ वर्षीया आमा धनमायाले दुर्गाप्रसादको ब्रतवन्ध, विवाह हेर्न बाँकी रहेको बताएकी छिन्। बिरामी भएर आएकाले पहिले उपचार गर्न लाग्नुपर्ने उनको भनाइ छ।