इटहरी- भोजपुर पात्लेधाराकी चन्द्रमाया कार्कीलाई सुनसरीको चतरा आउन पैदल चार घण्टाभन्दा बढी लाग्थ्यो । तर, सप्तकोशीमा व्यावसायिक जेटबोट सञ्चालनमा आएपछि अब एक घण्टामै पुग्न थालेकी छन् ।
पात्लेधाराबाट सिम्ले हुँदै सप्तकोशी पुल पुग्छिन् । पुलमुनिबाट जेटबोट चढ्छिन् र कोशी बगरबाट चतरा बजार पुग्न टेम्पो ।
हालै दुई वटा बाख्रा सुनसरी चक्रघट्टीबाट घर पुर्याउन सहज भयो, उनलाई । भन्छिन्, 'अब त मधेश र पहाड घरआँगनजस्तै लाग्न थालेको छ ।'
भोजपुरकै हतुवागढीका बोर्ण राई र स्यामराज राईले पनि अक्करको भीरबाट जोखिमपूर्ण यात्रा छाडेका छन् । सात घण्टाको दूरि अब एक घण्टामा छोटिएको छ ।
बोर्ण भन्छन्, 'उहिल्यै यस्तो सुविधा पाएको भए जीवन धेरै सहज हुने रहेछ । ढिलै भए पनि सुबिस्ता पाएका छौं ।'
व्यावसायिक जेट बोट सञ्चालनले भोजपुरको दक्षिणी भेगबाट तराई आउजाउ सहज बनाएको छ । चतराबाट चार घण्टामै भोजपुर सदरमुकाम पुग्न सकिन्छ, अहिले ।
चैत ०७४ देखि चतराबाट सिम्लेसम्म चल्छन्, यस्ता जेट बोट । एक पटकमा ३० जनालाई गन्तव्यसम्म पुर्याउँछन् ।
भोजपुरमा पर्ने सिम्ले उदयपुर र धनकुटाको पनि संगम स्थल हो ।
बराहक्षेत्र जल यातायात प्रालिका प्रबन्ध निर्देशक विमलमान श्रेष्ठका अनुसार पर्यटन र पारवहन दुवै कोणबाट उक्त सेवा प्रभावकारी देखिएको छ ।
यसअघि सुम्निमा जल यातायात प्रालिले पनि सप्तकोशीमा जेट बोट चलाएको थियो । तर, दुर्घटनामा एक जना बेपत्ता भएपछि बन्द हुन पुग्यो । बराहक्षेत्र प्रालिले भने यात्रुलाई लाइफ ज्याकेट र बीमा अनिवार्य गरेको छ ।
उक्त कम्पनीले करिब तीन करोड लगानीमा सेवा शुरु गरेको थियो । तमोर र सुनकोशीसम्म सेवा विस्तार गर्न थप दुई करोड लगानी थप्ने योजना बनाएको छ ।
मानवीय आवजावत मात्र होइन, खाद्यान्नलगायत अत्यावश्यक सामग्रीको ढुवानीमा पनि जेट बोट प्रयोग गर्ने योजना रहेको कम्पनीका अध्यक्ष सन्तोष भण्डारी बताउँछन् ।