काठमाडौं । प्रधानमन्त्री केपी शर्मा ओलीले सरकार अब फुल गियरमा दौडने बताएका छन् । सरकारको सय दिने काम, उपलब्धी र भावी योजनाको भिडियो सन्देश दिँदै प्रधानमन्त्रीले नयाँ आर्थिक वर्षको पहिलो दिनदेखि नै सरकारले पूर्ण गतिका साथ काम गर्ने बताए ।
नयाँ आर्थिक वर्षको शुरुदेखि संघ, प्रदेश र स्थानीय तहबीच समन्वयात्मक हिसाबले समृद्ध नेपाल र सुखी नेपालीको सपनालाई साकार पार्ने गरी काम गर्ने प्रधानमन्त्रीले बताए ।
'यो सरकार लोकप्रियताका लागि काम गर्दैन, बरु काम गरेर लोकप्रिय हुन्छ, पहिलो सय दिनका आफ्ना अनुभवका आधारमा विकास र समृद्धिको यात्रामा मुलुकलाई अघि बढाइनेछ,' प्रधानमन्त्री ओलीले भने, 'यस अवधिमा सार्वजनिक यातायात क्षेत्रको डरलाग्दो एकाधिकार तोडिएको, सुन तस्करीविरुद्ध निर्मम कारबाही प्रारम्भ भएको, ठूला परियोजना ओगटेर बस्नेमाँझ कारबाही शुरु भएको र रोजगारीको अभावमा काम खोज्न विदेशिन बाध्य नेपाली माथिको ठगी गर्नेमाथि कठोर कारबाही शुरु भएको छ ।'
प्रधानमन्त्री ओलीले केरुङ-काठमाडौँ-लुम्बिनी तथा काठमाडौँ-वीरगञ्ज रेलमार्गको चाँडै सर्वेक्षण गरिने बताउँदै नौ सय मेगावाट क्षमताको अरुण तेस्रो जलविद्युत् आयोजनाको शिलान्यास, भारतसँग समानताका आधारमा सम्बन्धनको थालनी, अनावश्यक विदेश भ्रमण र सार्वजनिक बिदामा कटौती, त्रिभुवन अन्तर्राष्ट्रिय विमानस्थलको २१ घण्टे सञ्चालन, विराटनगरस्थित भारतीय स्थल कार्यालय हट्नुलगायतलाई सरकारको सय दिनको उपलब्धिमा उल्लेख गरेका छन् ।
सार्वजनिक बिदा कटौतीबाट कूल एक करोड ९२ लाख कार्य दिन नाफामा जाने भएकाले विकासमा त्यसको प्रत्यक्ष सकारात्मक प्रभाव पर्ने प्रधानमन्त्री ओलीको भनाइ छ । प्रधानमन्त्रीले पाँच वर्षमा प्रतिव्यक्ति आय दोब्बर बनाउने बताउँदै समृद्ध र सुखी नेपाल बनाएरै छाड्ने प्रतिबद्धता जनाएका छन् ।
प्रकाशित: Dec 31, 2017| 18:23 आइतबार, पुस १६, २०७४