काठमाडौं- गणतन्त्र लोकतान्त्रिक आन्दोलनको सर्वोच्च रूप हो । विज्ञानको विद्यार्थी हुनुका नाताले राजनीति सबै नीतिको केन्द्रविन्दु रहेछ । त्यहाँबाट हस्तक्षेप नभएसम्म कुनै पनि प्राविधिक विषयमा दक्षता पाउन नसकिने रहेछ भन्ने चेतका साथ म राजनीतिमा होमिएँ । त्यतिबेलादेखि नै मलाई लागेको थियो, नेपालमा गणतन्त्र नआएसम्म लोकतन्त्रको कुनै औचित्य छैन ।
हामीले भन्ने गरेको आधुनिक युग युरोपमा भएको वैज्ञानिक क्रान्ति, औद्योगिक क्रान्ति र प्रबद्र्धन अभियानको उपज हो । र, त्यसैको विश्वव्यापीकरणको एउटा अंग पनि । त्यसभन्दा अघिको मध्ययुग अन्धकारमय नै थियो ।
राजा-महाराजा र सामन्तहरूले राज गर्थे । त्यसविरुद्ध जागेको चेतनाले वैज्ञानिक क्रान्ति सफल बनायो, जुन न्युटन र ग्यालिलियो जीवित छँदै भएको थियो । त्यही क्रममा विकास भएको प्रविधिले नै औद्योगिक क्रान्ति ल्यायो । त्यसको जगमा पुरानो राजतन्त्रात्मक प्रणाली बाधक रहेको विचार जन्मियो । र, त्यसैलाई प्रबद्र्धन अभियान भनियो ।
फ्रान्सेली दार्शनिकहरू भोल्तेयर, रुसो, मन्टेस्क्यु, हब्स, कान्टलगायतले लोकतन्त्र र गणतन्त्रको अवधारणा अगाडि सारे । र, सन् १७८९ मा फ्रान्सेली क्रान्ति भयो । त्यसको मुख्य नारा स्वतन्त्रता, समानता र भ्रातृत्व थियो । यो नै समग्र आधुनिक युगको शुरुवात थियो भनेर म मान्छु ।
त्यही विन्दुबाट दुई धार जन्मिए । एउटाले फ्रान्सेली क्रान्तिको स्वतन्त्रताको पाटोलाई लियो र व्यक्तिगत स्वतन्त्रतालाई मात्र लोकतन्त्र मान्यो । त्यसलाई पछि उदारवादी लोकतन्त्र, पुँजीवादी लोकतन्त्र भनियो । त्यो अपूर्ण भयो भनेर मार्क्सहरूको नेतृत्वमा फ्रान्सेली क्रान्तिकै दोस्रो पाटोका रूपमा समानताको कुरा आयो । त्यसलाई केन्द्रमा राखेर समाजवादी धार जन्मियो ।
२०औं शताब्दीमा आइपुग्दा निजी स्वतन्त्रतामा मात्र आधारित उदारवादी, पुँजीवादी लोकतन्त्र र समानता भनिएको समाजवादी लोकतन्त्र दुवै गतिरोधमा पुगे । यही क्रममा नेपालमा फ्रान्सेली क्रान्ति र अन्य देशमा भएजस्तो समाजवादी क्रान्ति पनि हुन नसकेको अवस्था रह्यो ।
हामीले सोच्यौं, विश्व उदारवाद, समाजवाद हुँदै नयाँ विचारको खोजीमा छ । र, त्यही उदारवाद पूर्वको अवस्थामा हामी छौं भन्ने मलाई लाग्यो । पहिले राजतन्त्र फालेर मात्र अगाडि बढ्न सकिन्छ नत्र केही गर्न सकिँदैन भन्ने लाग्यो ।
२००७ सालदेखि पटक-पटकका आन्दोलन पनि सफल हुन नसक्नुको कारण भनेको पनि राजतन्त्र नफालेरै हो भन्ने निष्कर्ष मैले निकालें । त्यसैले ०३३ सालतिरै अखिल भारत नेपाल विद्यार्थी संघ आफ्नै पहलमा खडा गरेर यो अभियान शुरु गरें ।
डा. भट्टरार्इसँग गरिएको कुराकानी भिडियोमा हेर्नुहोस्
मेरो चेतना र्याडिकल डेमोक्र्याट र रिपब्लिकन डेमोक्र्याट नै थियो । त्यसबेला बीपी कोइरालासँग म केही आकर्षित थिएँ । किनभने, नेपाली कांग्रेसले पनि मैले सोचेको अभियान चालेको छ भन्ने लागेको थियो ।
२०१७ सालपछि पञ्चायती व्यवस्थाविरोधी आन्दोलन थालेको थियो, कांग्रेसले । दुर्भाग्य, बीपी कोइरालाले राष्ट्रिय मेलमिलापको नीति भन्दै 'राजासँग मेरो घाँटी जोडिएको छ' भन्ने अभिव्यक्ति दिनुभयो ।
मलाई उहाँको भनाइले साह्रै धेरै दुःखी बनायो । उहाँप्रतिको मेरो आस्था र विश्वास टुट्न पुग्यो । र, म र्याडिकल रिपब्लिकन मुभमेन्टतिर लागें । कांग्रेसभित्र गणतन्त्रको पक्षमा उभिएका दुर्गा सुवेदी, प्रदीप गिरीहरूसँग पनि सहकार्य भयो ।
पुष्पलाल नेतृत्वमा रहेको कम्युनिस्ट धारले गणतन्त्रकै पक्षमा आवाज उठाउँदै आएको थियो । र, म पनि कम्युनिस्ट आन्दोलनमा जोडिन पुगें । पछि कम्युनिस्टहरूले पनि यो अभियान चलाउन सकेनन् ।
२०४७ सालपछि एमाले सम्झौतामा पुगेपछि त्यो अपुग भएको निष्कर्षका साथ माओवादी आन्दोलन निर्माण गरेर हामी अगाडि बढ्यौं । मलाई लागेको एक मात्र कुरा थियो, राजतन्त्रको अन्त्यपछि मात्र बल्ल लोकतन्त्रले पूर्णता पाउँछ । र, लोकतन्त्रको जगले मात्र समाजवाद आउँछ भन्ने मेरो बुझाइ थियो ।
माओवादी आन्दोलन शुरु गर्दा पनि ४० सूत्रीय माग अगाडि सारेका थियौं । त्यसको १० नम्बर बुँदामा 'जनप्रतिनिधिमार्फत् जनगणतन्त्रात्मक संविधान बनाउने' वाक्यांश समावेश छ । त्यतिबेलै म 'संविधानसभा' शब्द नै प्रयोग गर्न चाहन्थें । तर, प्रचण्डजीहरू 'संविधानसभा' शब्दावलीसँग सहमत हुनुहुन्नथ्यो ।
कम्युनिस्ट आन्दोलनमा रायमाझीहरूले राजतन्त्रप्रति नरम नीति लिए र ०१७ सालपछि संविधानसभाको नारा छाड्दै गए । सोही कारण कम्युनिस्ट आन्दोलनको अर्को धारले संविधानसभा र गणतन्त्रलाई खुला रूपमा ल्याउँदैनथ्ये, सीधै भन्दैनथे । त्यस धारमा मैले नै ती शब्दावलीको शुरुवाति प्रयोग गरेको हुँ ।
माओवादी आन्दोलन उचाइमा थियो । त्यही बेला दरबार हत्याकाण्डमा राजा वीरेन्द्रको वंश नाश भयो । मैले लेखें, 'अब नेपालमा गणतन्त्र आयो, ज्ञानेन्द्र कोतपर्वका अर्का नायक हुन् । जंगबहादुरका रूपमा फेरि आउन खोज्दैछन्, यसलाई मान्यता दिनु हुँदैन ।'
मेरो त्यस लेखले माओवादी आन्दोलनभित्र पनि ठूलो चर्चा र बहस चल्यो । लोकतान्त्रिक गणतन्त्र पनि ०५९ सालको एउटा लेखमा लेखें, कांग्रेस, एमाले र गणतन्त्रवादीहरू एक हुनुपर्छ ।
यही विषयलाई प्रचण्डजीहरूले मन पराउनुभएन र मलाई कारवाही गर्ने घोषणा गर्नुभयो । उहाँहरू ज्ञानेन्द्रसँग वार्ता गरेर सत्ता साझेदारी गरौं भन्ने 'लाइन'मा हुनुहुन्थ्यो । त्यो कम्युनिस्ट आन्दोलनभित्रको रायमाझी लाइनको निरन्तरता थियो ।
समाजवादमा पुग्नुअघि लोकतान्त्रिक गणतन्त्रको खुड्किलो टेक्नुपर्छ भन्ने मेरो सुसंगत धारणा थियो । तर, अन्ततः ज्ञानेन्द्रले सीधै सत्ता कब्जा गरेर माओवादीसँग वार्ता नगर्ने अडान लिए । अनि, हामी सबै मिलेर १२ बुँदे हुँदै, संविधानसभा र गणतन्त्रसम्म आयौं ।
१९ माघपछि मात्र प्रचण्डजी गणतन्त्रमा
माओवादी पार्टीमा लोकतान्त्रिक गणतन्त्रको हाम्रो नारामा १९ माघको ज्ञानेन्द्रको 'कु' पछि प्रचण्डजीहरू पनि आइपुग्नुभयो । जबकि, त्यही कुरा उठाउँदा ममाथि कारवाही भएको थियो । चुनबाङ बैठकले लोकतान्त्रिक गणतन्त्रको लाइन पारित गर्यो ।
मंसिर ०६१ मा हामीले १२ बुँदे सहमति गर्यौं । त्यतिबेला मेरै पहलमा गिरिजाप्रसाद कोइरालासँग प्रचण्डको भेट भएको हो । गिरिजाप्रसाद र प्रचण्डबीच चिनजान पनि थिएन, त्यतिबेलासम्म । गणतन्त्रको कुरा गर्दा गिरिजाप्रसाद, कृष्णप्रसाद सिटौला र शेखर कोइराला हुनुहुन्थ्यो । अनि, प्रचण्डजी र म बसेर कुरा गरेका थियौं ।
हामीले नै कुराकानी थालेका थियौं । गिरिजाबाबु त राजासहितको लोकतन्त्र भन्दै आउनुभयो । हामीले भन्यौं, 'त्यही कुराले तपाईंहरूले ००७ सालदेखि धोका खानुभयो । बीपी कोइरालाले पनि पहिले घाँटी जोडिएको छ भन्नुभएको थियो, त्यसले केही लाभ नदिएपछि उहाँले पनि छाड्नुभयो । यसरी राजतन्त्रले पटक-पटक धोका दिइरहेको छ । त्यसैले तपाईंहरूले पनि राजतन्त्रलाई छाड्नुपर्यो, गणतन्त्रमा आउनुपर्यो ।'
प्रचण्डजीहरू ज्ञानेन्द्रसँग सत्ता साझेदारी गर्ने 'लाइन'मा थिए, जुन कम्युनिस्ट आन्दोलनभित्र रायमाझी लाइनको निरन्तरता थियो ।
हामीले थप्यौं, 'तपाईंहरू गणतन्त्रमा आउनुभयो भने हामी पनि प्रतिस्पर्धाको राजनीतिमा आउँछौं । हिजो एकदलीय समाजवादी सत्ता, नौलो जनवाद भनेर हिँडेकै हो । तर, अहिलेको परिस्थितिमा एकदलीय प्रणाली भनेर हुँदैन । हामी बहुदलीय प्रणालीमा आउँछौं । तपाईंहरू गणतन्त्रमा आउनुपर्यो ।'
गिरिजाबाबुले भन्नुभयो, 'हामी पनि पुग्ने ठाउँ त्यही हो । अहिले शब्दै गणतन्त्र भनिनहाल्नुहोस् । जाने त्यहीं हो, ढुक्क हुनुहोस्, पुर्याउने पनि त्यही हो ।'
बुढाले भन्न त भने तर हुने के हो भनेर अलमलमा पर्यौं, हामी । हामीले बहुदलीय प्रतिस्पर्धामा सामेल हुने र उहाँहरू गणतन्त्रमा आउनुपर्ने दोहोर्यायौं । र, त्यसको प्रक्रिया मिलाउने सहमति भयो । परिणामस्वरूप १२ बुँदे सहमति भयो ।
त्यसको मस्यौदा बनाउने म, नारायणकाजी श्रेष्ठ र केपी ओली थियौं । नारायणकाजीलाई भाषा नरम बनाएर बुँदा तयार पार्नूस् भनें मैले । उनले ६ वटा बुँदा तयार पारे । केपी ओलीलाई त्यो जिम्मा लगाइयो । उहाँले १९ बुँदा बनाउनुभयो । र, मलाई फाइनल गर्न भन्नुभयो ।
र, मैले फाइनल १२ बुँदा तयार पारें । त्यहाँ गणतन्त्र नै लेख्नुपर्छ भनेका थियौं । तर, गिरिजाबाबुले 'जाने त्यहीं हो' भन्नुभएपछि मैले 'पूर्ण लोकतन्त्र लेखौं' भनें । दुवै पक्षले त्यसलाई गणतन्त्रका रूपमा बुझ्ने सहमति भयो । १२ बुँदेमा आएको पूर्ण लोकतन्त्र भन्ने शब्द त्यसरी आएको हो ।
१२ बुँदेकै जगमा ०६२/६३ को आन्दोलन भयो । त्यसपछि राजामार्फत् संसद पुनःस्थापना गराए, संसदवादी दलहरूले । हामीले त्यसको विरोध गर्यौं । किनभने, त्यहाँ संविधानसभाको कुरा थिएन ।
संविधानसभाको ग्यारेन्टीपछि मात्र युद्धविराम
हामीले राजाको वक्तव्यमा संविधानसभा नसमेटिएकामा तीन वटा विज्ञप्ति निकाल्यौं । र, युद्ध जारी राख्ने निष्कर्ष निकाल्यौं । उहाँहरूले पुनःस्थापित संसद्मार्फत् संविधानसभा घोषणा गर्ने बताउनुभयो । र, १५ वैशाखमै संविधानसभामा जाने घोषणा गर्नुभयो ।
त्यसपछि मात्र युद्धविराम घोषणा गरेर वार्तामा आयौं । त्यसपछि पनि गणतन्त्र घोषणामा बाधा आयो । विस्तृत शान्ति सम्झौता हुँदै अन्तरिम संविधान र अन्तरिम सरकारसम्म आउँदा गणतन्त्रमा जाने भन्ने भयो । तर, संविधानसभाको पहिलो बैठकबाट गणतन्त्र घोषणा गर्ने विषय समेटियो ।
त्यहीअनुसार हामी सरकारमा गयौं । क्रान्तिकारी जोशका कारणले पनि होला, संविधानसभामै लटरपटर गरेर चुनाव पनि उनीहरूले नै मात्र जित्ने पो हुन् कि भन्ने शंका हामीलाई लाग्न थाल्यो ! राजतन्त्र राख्ने पो हुन् कि यिनले !
त्यही शंकाका बीच हामीले भदौ ०६४ मा सरकार छाड्यौं । साउनमा हाम्रो बालाजु बैठक बसेको थियो, जसमा पहिले गणतन्त्र घोषणा गरौं नत्र धोका हुने निर्णय गर्यौं ।
कृष्णबहादुर महरा, हिसिला यमीलगायत नेता सरकार छाडेर आएपछि असोज, कात्तिक र मंसिरमा हामीले सडकबाट संघर्ष चलायौं । हाम्रो माग अहिले नै गणतन्त्र घोषणा गर्नुपर्छ भन्ने थियो । त्यसपछि पुसमा फेरि सम्झौता भयो । त्यसमा भनियो, 'राजालाई सबै अधिकारबाट वञ्चित गराउने, कार्यवाहक राष्ट्राध्यक्ष बन्ने र त्यसको औपचारिकता संविधानसभाको पहिलो बैठकले गर्ने ।'
त्यसपछि सरकारमा पुनः सहभागी भएर पहिलो संविधानसभाको चुनाव भयो । चुनावपछि १५ जेठमा 'गणतन्त्र नेपाल' घोषणा भयो ।
चुनावमा माओवादी सबैभन्दा ठूलो पार्टी भएपछि कांग्रेस, एमाले हच्किए । माओवादीले करिब ४० प्रतिशत मत छ । न त माओवादीलाई बाहिर राख्न सकिन्थ्यो, न कांग्रेस, एमालेलाई । त्यसपछि बहुमतीय आधारमा सरकार गठन गर्ने कुरा आयो । र, माओवादी संकटमा पर्यो ।
पहिलो बैठक नबसी गणतन्त्र नआउने, बहुमतीय शब्द नराखी कांग्रेस, एमाले बैठक बस्नै नमान्ने । बहुमतीय प्रणालीमा सहमति भएपछि मात्र संविधानसभाको पहिलो बैठक बस्यो । र, लामो संघर्षको परिणामका रूपमा नेपाल संघीय लोकतान्त्रिक गणतन्त्र घोषणा भयो ।
दुर्भाग्य, त्यही संविधानसभाका लागि मैले पार्टी भित्र र बाहिर पनि संघर्ष गरें । आफैं प्रधानमन्त्री भएको बेलामा पहिलो संविधानसभा संविधान जारी गर्न नसकी विघटन भएको घोषणा गर्नुपर्यो । यो मेरो जिन्दगीकै सबैभन्दा नमिठो क्षण हो ।
गिरिजाबाबुका बाधक वैद्य, बादल र विप्लव
संविधानसभाको पहिलो बैठक बोलाउनै सकस भएको थियो । त्यसपछि राष्ट्रपति निर्वाचन गर्ने विषयमा पनि अर्को अड्चन आयो । त्यतिबेला हाम्रो आन्दोलनलाई साथ दिएर आउनुभएका गिरिजाबाबुलाई नै राष्ट्रपति बनाउने हाम्रो भित्री सहमति थियो ।
उहाँ आफैंले त भन्नुभएको थिएन । तर, कृष्णप्रसाद सिटौलालगायत उहाँ निकटस्थ नेताहरूले त्यस्तो आशय प्रकट गर्नुभएको थियो । संविधासभा चुनावको परिणामपछि हाम्रा साथीहरूमा कांग्रेसलाई नै मुख्य दुश्मन देख्ने प्रवृत्ति आयो ।
साथीहरूले भने, 'किन गिरिजालाई राष्ट्रपति बनाउने ?' धुलिखेल बैठकमा कांग्रेससँगै लडेर जाने प्रस्ताव पारित भयो । मोहन वैद्य, रामबहादुर थापा 'बादल' र नेत्रविक्रम चन्द 'विप्लव'ले त्यस धारको नेतृत्व गरेका थिए ।
म, प्रचण्ड, टोपबहादुर रायमाझी, पोष्टबहादुर बोगटीलगायत नेता केही समय मिलेरै जानुपर्छ भन्नेमा थियौं । तर, उहाँहरूले 'हाम्रो दुश्मन नै कांग्रेस भएपछि कहाँ मिल्ने भिडेर जानुपर्छ, अब सहकार्य गर्ने चरण नै सकियो' भन्नुभयो ।
माओवादीको पोलिटब्युरोमा पनि हाम्रो विपक्षकै मत बढी भयो । हामी चार जना एकातिर भयौं, १५ जनामा ११ जना अर्कोतिर । हामीले सहमति तोड्ने भनेर त निर्णय गरेनौं । तर, चाहँदा चाहँदै पनि गिरिजाबाबुलाई राष्ट्रपति बनाउन सकेनौं ।
उहाँसँग शंका पनि नभएको चाहीं होइन हामीलाई । बुढा चलाख छन्, स्थापित पनि हुन् । राष्ट्रपति बनेर सबै लट्पट्याउने हुन् कि भन्ने शंका थियो । तर, यहाँसम्म मिलेर आइसकेपछि बनाऊँ भन्नेमा थियौं, प्रचण्ड र म । पार्टीभित्रको फरक धारका कारण नबनाउने निष्कर्षमा पुग्यौं ।
भिडियो हेर्नुहोस्
मधेशकेन्द्रित दलले धोका दिए
त्यसपछि रामराजाप्रसाद सिंहलाई राष्ट्रपतिको उम्मेदवार प्रस्ताव गर्ने पनि मै हो । उहाँसँग मेरो ०२८ सालदेखि नै व्यक्तिगत सम्बन्ध/सम्पर्क थियो । अस्कल कलेजमा आईएस्सी पढ्दा उहाँ राष्ट्रिय पञ्चायतमा स्नातकबाट निर्वाचित हुनुभएको थियो । तर, सपथग्रहण गर्न दिइएको थिएन ।
त्यतिबेला उहाँको पर्चामा गणतन्त्र ल्याउने थियो र हामी त्यो पर्चा बाँड्दै हिँड्थ्यौ । त्यतिबेला मेरो प्रेरणा हुनुहुन्थ्यो, उहाँ । ०४२ सालको बम काण्डपछि उहाँका नजिकका साथी राम कार्की, कुमार पौडेललगायत हामीसँग पनि आउनुभयो र व्यक्तिगत रूपमा मसँग नजिक पनि हुनुभयो ।
जनयुद्धकालमा पनि भूमिगत रूपमा भेट्थ्यौं । बुढेसकालमा पनि उहाँको जोशचाहीं कडा । उहाँ भन्नु हुन्थ्यो, 'छोड्नु हुन्न है, गणतन्त्र ल्याउनै पर्छ, मैले सकिनँ । म पनि चे ग्वेभाराबाट प्रभावित भएर विद्रोहमा लागेको, अहिले तपाईंहरूले अगाडि बढाउनुभएको छ, तपाईंहरूलाई मेरो साथ छ ।'
त्यसैले गणतन्त्रका मुख्य हकदार उहाँ नै हो भन्ने लागेको थियो । फेरि पहाड र मधेश जोड्नका लागि राम्रो सन्देश पनि जान्छ भनेर प्रस्ताव राखें, जुन पार्टीले स्वीकार्यो ।
रामराजाप्रसादलाई उठाएपछि मधेशकेन्द्रित दलहरूको साथ पाइहालिन्छ भन्ने सरल बुझाइ हाम्रो भयो । तर, एमाले र कांग्रेस मिलेर मधेशकेन्द्रित दलहरूलाई मिलाइसकेछन् ।
रामराजाका पक्षमा कुरा गर्न उपेन्द्र यादवकहाँ गएको त 'हामीले उता वचन दिइसक्यौं' भन्नुभयो । रामराजाप्रसाद मधेशका पनि साझा उम्मेदवार बन्ने हाम्रो बुझाइ थियो । मधेशकेन्द्रित दलहरू आएको भए बहुमत हाम्रो पक्षमा हुन्थ्यो ।
अन्त्यमा केही गर्न सकिन्छ कि भनेर विजय गच्छदार र जेपी गुप्तासँग पनि छलफल गर्यौं । 'रामराजालाई नै बनाउनुपर्छ, त्यहाँको मत ल्याउँछौं, उपेन्द्रले केही मत लगे पनि धेरैभन्दा धेरै मत ल्याएर यतै बहुमत ल्याउँछौं' उहाँहरूले भन्नुभयो ।
थोरै आशामा बस्यौं । पहिलो चरणमा बहुमत आएको थियो । दोस्रो चरणमा बहुमत आएन र रामराजाप्रसाद सिंह हार्नुभयो । डा. रामवरण यादवलाई राष्ट्रपति बन्ने चिठ्ठा पर्यो । उहाँहरूले जित्ने निश्चित भएर डा. यादवलाई उठाउनुभएको थिएन ।
जित्ने निश्चित भएको भए त गिरिजाबाबु नै उठिहाल्नु हुने थियो । हामीले नदिएकामा उहाँमा पनि रिस थियो । पछि डा. यादवसँग भेटका बेला उहाँले पटक-पटक भन्नुभयो, 'गणतन्त्र तपाईंहरूले ल्याउनुभयो, राष्ट्रपति म बनें ।' वास्तविकता पनि त्यही थियो ।
यसरी विघटन भयो संविधानसभा
पहिलो संविधानसभा विघटनको भित्री पाटो धेरै गहिरो छ । बाहिरी सतहमा आएजस्तो मैले विघटन गराएको होइन । म मेरै पालामा, आफ्नै जीवनकालमा संविधानसभाबाट संविधान बनेको हेर्न चाहन्थें । यदि त्यसो भएको भए म जति सन्तुष्ट कोही हुने थिएन ।
आफैं प्रधानमन्त्री रहेको बेला १४ जेठ ०६८ मा पहिलो संविधानसभा विघटन भयो ।
२ जेठमा १० वटा प्रदेश, फ्रान्सेली शैलीको राष्ट्रपतीय प्रणाली र सर्वोच्च अदालतका प्रधानन्यायाधीशकै नेतृत्वमा अरु संयन्त्रको संवैधानिक अदालत गठन गर्ने सहमति भयो । तर, पार्टीभित्रकै मोहन वैद्यजीहरूले विरोध गरिदिनुभयो ।
उपेन्द्र यादवलगायत मधेशकेन्द्रित दलहरूले पनि त्यसको विरोध गरे । पार्टीभित्रकै जनजाति साथीहरूले पनि विरोध गरे । त्यसपछि प्रचण्डजीले पनि खुट्टा छाडिदिनुभयो । ७ जेठमा त नेपाल बन्द नै बयो । १४ जेठ नजिक आइसक्दा २ जेठको सहमति भंग भयो ।
संविधानसभा बचाउने एक मात्र विकल्प म्याद थप्ने मात्र थियो । कृष्णप्रसाद सिटौला पनि मेरो नेतृत्वको सरकारमा हुनुहुन्थ्यो । हामीले ९ जेठमा निर्णय गरेर म्याद थपको प्रस्ताव संधिवानसभामा पठायौं ।
कानुन मन्त्रीको हैसियतले सिटौलाले दर्ता गर्नुभयो । तर, कांग्रेस सभापति सुशील कोइरालाले साँझ पत्रकार सम्मेलन गरेर विरोध गर्नुभयो । र, मुद्दा हाल्न लगाउनुभयो । कांग्रेसकै केही वकिलले मुद्दा हाले । ११ जेठमा तत्कालीन प्रधानन्यायाधीश खिलराज रेग्मीले संविधानसभाको म्याद थप गर्न नमिल्ने भनेर फैसला दिनुभयो ।
अनि हाम्रा हातखुट्टा बाँधिए । २/३ दिन बाँकी रह्यो । तत्कालीन सभामुख सुवास नेम्वाङलाई संविधानसभाको बैठक बोलाउनूस् भनें । उहाँले सहमति नभई बोलाउँदिन भन्नुभयो ।
१४ जेठमै पनि सबैलाई बालुवाटारमा बोलाएर सहमतिका लागि आग्रह गरें । तर, सफलता मिलेन । साँझ सभामुखकै कार्यकक्षमा म्याद थपका विषयमा कुराकानी गर्यौं, त्यहाँ पनि सहमति जुटेन ।
मसँग संकटकाल घोषणा गरेर म्याद थप्न सक्ने अन्तिम अस्त्र बाँकी थियो । त्यो मेरा लागि कालो टीका लगाएसरह हुन्थ्यो । मैले प्रस्ताव गरें, 'संकटकाल लगाएर म्याद थप्छु ।' शेरबहादुर देउवाबाहेक सबै नेताले मानेनन् ।
कांग्रेस सभापति थिएनन्, देउवा । सभापति सुशील कोइरालाले विरोध गरे । कृष्णप्रसाद सिटौला नै संकटकालको प्रस्ताव आउँदै गरेको सन्देश लिएर राष्ट्रपति डा. रामवरण यादवकहाँ पुग्नुभएछ । र, त्यसलाई रोक्न आग्रह गर्नुभएछ ।
मलाई खबर आयो, 'तपाईंले क्याबिनेटबाट पारित गरे पनि जारी गर्ने त राष्ट्रपतिले हो ।' सबैतिरबाट यसरी धर्मसंकटमा परें ।
मध्यरातमा स्वतः विघटन हुन्थ्यो । राति १० त बजिसकेको थियो । परामर्श गर्दा वकिलहरूले भने, 'अब संविधानसभा त्यसै तुहिन सक्छ । ००७ सालदेखिको षडयन्त्र अहिले पनि हावी हुन्छ । यहाँभित्र ठूलो डिजाइन पनि हुन सक्छ । त्यसैले तपाईंले कमसेकम अर्को संविधानसभाको चुनाव घोषणा गरिदिनूस् ।'
त्यसपछि संविधानसभा चुनाव कसले गराउने, 'कु' हुने, सेनाको हातमा जाने खतरा औंल्याए, वकिलहरूले । उनीहरूकै सुझावका आधारमा मैले दोस्रो संविधानसभाको निर्वाचन मिति घोषणा गरेको हुँ ।
तर, आम मानसिकतामा बाबुरामले नै संविधानसभा विघटन गर्यो भन्ने पर्यो । निर्वाचित प्रधानमन्त्रीको हैसियतमा मैले दोस्रो संविधानसभाको निर्वाचन घोषणा गरेको थिएँ । तर, कानुन पढेका वकिल भन्नेहरूले पनि यस्तो कुरा नबुझेको देख्दा मलाई अचम्म लाग्छ ।
संविधानसभाबाट गणतन्त्रको अनुमोदन गरिएकाले यो संस्थागत भएको छ । अब सैनिक 'कु' गरेर संविधान मिचियो भने मात्रै हो, नत्र गणतन्त्र गुम्ने अरू कुनै खतरा छैन । तर, संकटमा परेकोचाहीं लोकतन्त्र हो ।
लोकतन्त्र गतिशील हुन्छ । यसका परिभाषा त धेरै छन् तर हामीले संघीयता र समावेशितासहितको लोकतन्त्र भनेका छौं । त्योचाहीं अझै पूर्ण हुन सकेको छैन । (पूर्वप्रधानमन्त्री डा. भट्टराईसँगको कुराकानीमा आधारित)
प्रकाशित: Dec 31, 2017| 18:23 आइतबार, पुस १६, २०७४
उनीहरूको अनुहारमा बेसहाराको सहारा बन्दै उनीहरूको भोक, प्यास, नाना, माना र छानाको चिन्ता हुन्छ। बिहान उठेदेखि अबेर रातिसम्म उनीहरू तिनैको सहारा बन्ने कर्ममा कर्मशील भइरहेका...