एमालेसँग सत्ता सहकार्य हुँदैन : जसपा

काठमाडौं– जनता समाजवादी पार्टीले विभिन्न आन्दोलनबाट प्राप्त उपलब्धि बचाउनु नै अहिलेको मुख्य विषय भएको बताएको छ। 

पार्टी संसदीय दलको बैठकपछि पत्रकारहरुसँग कुरा गर्दै जसपा नेता राजेन्द्र श्रेष्ठले भने, ‘जसले ती उपलब्धि समाप्त गर्न खड्ग लिएर हिँडेको छ, उसैसँग सहकार्य हुन सक्दैन। जसको विरुद्ध लडाइँ लडिएको छ, उसैसँग घाँटी जोड्ने कुरा हुँदैन। गठबन्धन त प्राकृतिक हुनुपर्छ।’

श्रेष्ठले प्रधानमन्त्री केपी ओलीप्रति लक्षित गर्दै यस्तो बताएका हुन्। तर, राजनीतिक निकासका लागि सबै पक्षसँग संवाद गर्न भने पार्टी तयार रहेको उनले बताए।  सहकार्यका बारेमा पार्टी छलफलकै क्रममा रहेको उनले सुनाए। 

संघीय समाजवादी र जनता समाजवादी पार्टी एकीकृत भएर जनता समाजवादी पार्टी बनेपछि पहिलोपटक संसदीय दलको बैठक बसेको हो।