काठमाडौं– नेपाल कम्युनिस्ट पार्टी नेकपाका अध्यक्ष ऋषि कट्टेलले अदालतले आफ्नो दललाई न्याय दिएको बताएका छन्।
सर्वोच्च अदालतले आइतबार कट्टेल नेतृत्वको नेकपा नै वैधानिक पार्टी भएको फैसला गरिदिएपछि उनले सत्तामा बसेकाहरुले गरेको अन्यायलाई अदालतले न्याय दिएको बताएका हुन्।
‘हामीमाथि दुई वटा झगडिया (केपी ओली र पुष्पकमल दाहाल) ले अन्याय गरेका थिए। हामीले सडक र कानुनी रूपमा त्यसको प्रतिरोध गरिरहेका थियौं,’ उनले नेपाल समयसँग भने, ‘अहिले अदालतले न्याय दिएको छ।’
उनले आफ्नो पार्टी जनसंघर्षमा रहेको र त्यसलाई नै निरन्तरता दिने बताए।
‘हामी जनसंघर्षमा थियौं। त्यसलाई निरन्तरता दिन्छौं। हामीलाई यो फैसलाले केही फरक पर्दैन। सरकारी पक्षलाई फरक पर्ने हो,’ उनले भने।
उनले आफू नेतृत्वको नेकपाले वैधानिकता पाएपछि ढुक्क भएको बताए।
‘निर्वाचन आयोगले दुई साँढे (ओली र दाहाल) को दबाबका कारणले नाम जुध्ने दल दर्ता गरिदिएको थियो। म साथीहरुसँग भएका बेला नै पत्रकार साथीहरुले फोन गरेर फैसलाको जानकारी दिनुभयो। मलाई ढुक्क लागेको छ,’ कट्टेलले भने, ‘अदालत जाने तयारीमा थिएँ। बाटैमा फैसला सुन्न पाइयो।’
उनले आधिकारिकताका विषयमा पहिलेदेखि नै भ्रम फैलाइएको गुनासोसमेत गरे। ‘पहिले पनि हामी नै आधिकारिक थियौं। आधिकारिकता खोस्ने ठाउँ नै थिएन। किनकि दल दर्ता र त्यसको प्रमाणपत्र हामीसँग थियो,’ उनले भने, ‘तर दुई साँढे प्रश्न उठ्ने गरी नाम जुधाउँदै दल दर्ता गर्न गए र आयोगले गरिदियो।’
उनले नेकपाको आधिकारिकता ओली–दाहालले नै पाउँछन् कि भन्ने धेरैले आशंका गरे पनि आफू भने विश्वस्त रहेको सुनाए।
‘अब नेकपा एमाले र माओवादी केन्द्र नै हुने भयो भन्ने फैसला आएको छ रे१ पढेको छैन। उनीहरुको जे थियो, त्यही पाए,’ कट्टेलले भने, ‘मैले आफ्नो दलको वैधानिकता पाएँ। जे हुनुपर्ने हो उनीहरुलाई भयो। मलाई केही फरक पर्ने होइन क्यारे!’
सर्वोच्चले आइतबार कट्टेल नेतृत्वको नेकपालाई वैधानिकता दिने फैसला गरेको थियो। यस्तै साविकका नेकपा एमाले र नेकपा माओवादी केन्द्र नै कायम रहने र एकता गर्नुपर्ने भए नयाँ प्रक्रियाअनुसार जानुपर्ने फैसला सर्वोच्चले गरेको छ।