जनकपुरधाम- जनकपुरधाम आएर पूजाअर्चना गर्ने भारतीय प्रधानमन्त्री नरेन्द्र मोदीको चाहना चार वर्षपछि मात्र पूरा भयो । तर, त्यस क्रममा भएको खर्च प्रदेश सरकारले हालसम्म सार्वजनिक गर्न सकेको छैन ।
मुख्यमन्त्री कार्यालयका अनुसार मोदीको स्वागत, मञ्च निर्माण, सरसफाइ, जनपरिचालन, सुरक्षा र प्रचारप्रसार शीर्षकमा सात करोड २० लाख रुपैयाँ खर्च भएको छ । मोदीले करिब तीन घण्टा जनकपुरमा बिताएका थिए ।
रंगभूमि मैदानमा आयोजित नागरिक अभिनन्दनमा जनकपुर उपमहानगरको नभई प्रदेश सरकारकै हालीमुहाली थियो । उपमहानगरका मेयर लालकिशोर साहले अभिनन्दन पत्र वाचन गरेर प्रदेश सरकारलाई साथ मात्र दिए ।
भ्रमणको व्यवस्थापन र संयोजनको जिम्मेवारी प्रदेश सरकारले नै लिएको थियो । त्यसका लागि मुख्यमन्त्री लालबाबु राउतको संयोजकत्वमा दुई हजार ६ सदस्यीय मूल समारोह समिति गठन भएको थियो ।
भौतिक पूर्वाधार तथा विकास मन्त्री जितेन्द्र सोनलको संयोजकत्वमा गठित १० सदस्यीय मञ्च व्यवस्थापन समितिले मात्र करिब तीन करोड खर्च गरेको छ । नागरिक अभिनन्दन समारोहको मञ्च निर्माणमा भारतीय कम्पनीलाई संलग्न गराइएको थियो ।
मुख्यमन्त्री कार्यालयले भारतीय दूतावास र सुरक्षाकर्मीको निर्देशनमा विहार मोतिहारीको मनोजकुमार राज एन्ड कम्पनीलाई ठेक्का दिएर मञ्च र पण्डाल निर्माण गराएको थियो । भौतिक योजना तथा विकास मन्त्रालयका लेखा अधिकृत दिनेश पण्डितका अनुसार त्यसका लागि एक करोड ३४ लाख रुपैयाँ भुक्तानी दिइएको थियो ।
वीरगञ्जस्थित भारतीय महावाणिज्य दूतावासकै पहलमा उक्त कम्पनीलाई ठेक्का दिइएको हो ।
मोदी भ्रमणका लागि सरसफाइ, स्वागत र भौतिक संरचना मर्मत सुधारमा मात्र दुई करोड ५० लाख रुपैयाँ प्रदेश सरकारले खर्चिएको छ । लेखा अधिकृत पण्डितका अनुसार रंगभूमि मैदानमा शौचालय बनाउन मात्र २० लाख रुपैयाँ खर्च भएको छ ।
जीके कन्स्ट्रक्सनका ज्ञानेन्द्र झालाई आठ वटा अस्थायी शौचालय र ३८ वटा पिसाब फेर्ने ठाउँ (युरिनल) निर्माणको ठेक्का दिइएको थियो । मञ्चमा भीआईपी शौचालय निर्माण गरिएको थियो ।
मन्त्रालयका एक प्राविधिकका अनुसार भीआईपी शौचालय र अन्य अस्थायी सेट उपमहानगरका कर्मचारीले लगेका छन् ।
रंगभूमि मैदानमा ग्राभेल गर्न प्रदेश सरकारले एक करोड रुपैयाँ खर्च गरेको छ । उक्त कामको जिम्मा जनकपुरस्थित चौधरी कन्स्ट्रक्सनका दीपेन्द्र ठाकुरलाई दिइएको थियो ।
प्रदेश सरकारले इन्धन शीर्षकमा करिब तीन लाख रुपैयाँ खर्च गरेको छ । सरसफाइ र स्वागतद्वार निर्माणमा ६ लाख ५० हजार रुपैयाँ सकिएको छ । उक्त रकमबाट ८६ वटा स्वागतद्वार बनाइएको थियो ।
त्यसबाहेक १५ सय वटा टी-सर्ट वितरणका लागि तीन लाख २५ हजार रुपैयाँ खर्च भएको छ । र, सरसफाइमा एक लाख ७५ हजार रुपैयाँ सकिएको छ ।
भूमि व्यवस्था, कृषि तथा सहकारी मन्त्री शैलेन्द्रकुमार साह संयोजकत्वको जनपरिचालन समितिले ८८ लाख रुपैयाँ सकेको छ । प्रदेशका आठ वटा जिल्लाबाट सर्वसाधारणलाई जनकपुरसम्म ल्याउन ३० वटा बस भाडामा लिइएको थियो ।
आगन्तुकलाई बसमै खाजा, खाना र पानीको व्यवस्था गरिएको मन्त्री साहको भनाइ छ । जनकपुरले गर्ने नागरिक अभिनन्दनमा अन्य जिल्लाबाट सहभागी गराएर प्रदेश सरकारले जथाभावी खर्च गरेको राष्ट्रिय जनता पार्टी (राजपा)का युवा नेता अरुण झा बताउँछन् ।
पिउने पानीका लागि ठूलो रकम खर्च भएको बताइए पनि अभिनन्दन समारोहमा एक थोपा पिउन नपाइएको सहभागीहरू बताउँछन् ।
प्रचारप्रसारमा मात्रै एक करोड १० लाख रुपैयाँ खर्च भएको छ । ब्यानर, पोस्टर, झण्डालगायत शीर्षकमा उक्त रकम खर्च गरिएको हो । उद्योग, पर्यटन, वन तथा वातावरण मन्त्री रामनरेश राय यादवको संयोकत्वमा प्रचार प्रसार समिति गठन गरिएको थियो ।
समितिका सदस्यहरू नै खर्च अनुमोदन गर्न तयार नभएपछि विवाद बढेको एक प्रदेशसभा सदस्य बताउँछन् ।
प्रकाशित: Dec 31, 2017| 18:23 आइतबार, पुस १६, २०७४