बुटवल– अर्थमन्त्री एवं नेकपाका महासचिव विष्णु पौडेलले मध्यरातमा अँध्यारो कोठामा तानाबाना बुन्ने काम भएको बताएका छन्। उनले सरकार गिराउन अप्राकृतिक गठनबन्धन भइरहेको आरोप पनि लगाए।
रुपन्देहीको तिलोत्तमा नगरपालिकाको प्रशासकीय भवन बिहीबार उद्घाटन गर्दै पौडेलले यस्तो कुरा बताएका हुन्। नयाँ नक्सा प्रकाशन गरेपछि केपी ओली सरकारविरुद्ध प्रहार सुरु भएको उनले बताए।
विप्लव नेतृत्वको नेकपा र सरकारबीच वार्ता भएर तीन बुँदे सहमति भएको उल्लेख गर्दै उनले प्रधानमन्त्री र विप्लवले सहमति गरेको जानकारी दिए। विखण्डनको पक्षमा नारा लगाउने डा. सिके राउतलाई पनि सम्झाएर सहमतिमा ल्याउन ओली नेतृत्वको सरकार सफल भएको उनले बताए।
अर्थमन्त्री पौडेलले तिलोत्तमालाई महानगर बनाएर छाड्ने दाबी गरे। बुटवल र भैरहवाको मध्यभागमा अवस्थित तिलोत्तमालाई केन्द्र बनाएर महानगर बनाउने पौडेलले सुनाए।
‘सैनामैना, देवदह र सिद्धार्थनगरलाई जोडेर महानगर बन्छ। रुपन्देही विकास निर्माणका दृष्टिले नेपालमै रोल मोडल बनेको छ। विकास सिक्न रुपन्देही आउनुपर्छ,’ उनले भने।