काठमाडौं- सहिद स्मारक बी डिभिजन लिगमा सातदोबाटो युथ क्लबले शीर्षस्थानमा तीन अंकको अग्रता बनाएको छ।
सिजनको आठौं खेलमा जित निकाल्दै उसले दोस्रो स्थानको खुमलटार युथ क्लबभन्दा तीन अंक धेरै बनाएको हो।
सातदोबाटोस्थित एन्फा कम्प्लेक्समा आज (सोमबार) सम्पन्न दोस्रो खेलमा सातदोबाटोले श्री भगवती क्लबलाई १–० गोलले हरायो।
सातदोबाटोको लागि खेलको २४ औं मिनेटमा दोर्जे तामाङले गोल गरेका थिए। पेनाल्टीमा पाएको अवसरको सदुपयोग गर्दै तामाङले गोल गरेपछि पहिलो हाफमै सातदोबाटोले अग्रता बनाएको थियो।
तर दोस्रो हाफमा कुनै गोल हुन नसक्दा तामाङको गोल नै निर्णायक बन्यो।
यो जितसँगै सातदोबाटो क्लबले सात जित र एक बराबरीका साथ २२ अंक बनाएको छ। ऊ लिगमा अपराजित एकमात्र क्लब हो। यता पराजित भगवती क्लब छ अंकका साथ नवौं स्थानमा छ।