काठमाडौं - एसोसिएसन अफ प्राइभेट हेल्थ इन्स्टिच्युसन नेपाल (अफिन)ले चिकित्सक परामर्श शुल्क चैत १ गतेदेखि कार्यान्वयन गर्न अनुरोध गरेको छ।
फागुन मसान्तसम्म पनि शुल्क निर्धारणसम्बन्धी स्वास्थ्य मन्त्रालयले कुनै पहल नगरे हालै सार्वजनिक गरिएको शुल्क कार्यान्वयन गर्न अनुरोध गरेको हो।
स्वास्थ्य तथा जनसंख्या मन्त्रालयसँग परामर्श शुल्कको विषयमा कुनै छलफल नभएको अफिनले जनाएको छ। तर, आफ्नो सहमतिबिना निर्णय गरेको भन्दै मन्त्रालयले नयाँ शुल्क लागु नगर्न आग्रह गरेको छ।
फागुन ४ मा नेपाल चिकित्सक संघ र अफिनको संयुक्त बैठकले शुल्क बढाउने निर्णय गरेको थियो।
जसअनुसार एमबीबीएस र बीडीएस चिकित्सकहरू पाँच वर्ष अनुभव भएकाले ३७० र पाँच वर्षभन्दा बढी अनुभव भएकाहरूले ४५० रूपैयाँ परामर्श शुल्क लिन पाउने छन्।
यस्तै डिप्लोमा चिकित्सकहरू पाँच वर्ष अनुभव भएकाले ५१५ र त्यसभन्दा बढी अनुभव भएकाहरूले ५९० शुल्क लिन पाउने छन्।
यस्तै एमडी, एमएस र एमडीएस चिकित्सकहरू पाँच वर्ष अनुभव भएकाले ६६० र त्यसभन्दा बढी अनुभव भएकाहरूले ७०० रूपैयाँ शुल्क लिन पाउने निर्णय गरिएको छ।
डीएम तथा एमसीएच गरी पाँच वर्ष अनुभव भएकाहरूले परामर्श शुल्कबापत् ७७० रूपैयाँ लिन पाउने छन्।
यस्तै डीएम तथा एमसीएच गरी पाँच वर्षभन्दा बढी अनुभव भएका तथा एमडी एमएस, एमडीएस गरी १० वर्षभन्दा बढी अनुभव भएकाहरूले ८२५ रूपैयाँ परामर्श शुल्क लिन पाउने निर्णय गरिएको छ।