काठमाडौं - नेपाल हस्तकला महासंघ, महिला उद्यमी विकास समितिको आयोजनामा महिला हस्तकला मेला हुने भएको छ।
महिला हस्तकला उद्यमीबाट निर्माण गरिएको हस्तकलाका सामग्रीलाई प्रचारप्रसार गर्नका लागि आगामी फागुन २२ देखि २४ सम्म महिला हस्तकला मेला आयोजना हुन लागेको हो।
ललितपुरमा हुन लागेको उक्त मेलामा फेल्ट, ऊनी, काठ, पोते, पश्मिना, ढाकाका कपडा, नेचुरल फाइबर, सिल्भर, ज्वेलरी, स्वीटर कटनलगायतका सामग्री प्रदर्शनमा राखिने महिला उद्यमी विकास समिति संयोजक सवितासिंह महर्जनले जानकारी दिइन्।
मेलामा काठमाडौं उपत्यकाका महिला उद्यमीले निर्माण गरेका हस्तकलाका सामग्री प्रदर्शनमा राखिने छ। मेलामा ५० भन्दा बढी कक्ष रहनेछन्।
यस्तै नेपाल हस्तकला महासंघको आयोजनामा २०७८ वैशाख ९ देखि १३ गतेसम्म काठमाडौंको भृकुटीमण्डपमा हस्तकला मेला आयोजना हुन लागेको छ।
नेपालको हस्तकला विश्वमाझ चिनाउनका लागि हरेक वर्ष आयोजना हुने उक्त मेला २०७७ मा कोरोना सङ्क्रमणका कारण रोकिएको थियो। रासस