काठमाडौं- ओमन भ्रमणअघि सञ्चालन गर्ने भनिएको काठमाडौं मेयर कप क्रिकेट प्रतियोगिता भ्रमण स्थगित भएपछि अब फागुन २२ गतेदेखि नै सञ्चालन हुने भएको छ।
नेपाल क्रिकेट संघ (क्यान)ले आज एक सूचना जारी गर्दै फागुन २२ गतेदेखि प्रतियोगिता सञ्चालन गर्ने बताएको हो।
क्यानको सूचनामा भनिएको छ, ‘प्रतियोगिता त्रिवि र मुलपानी क्रिकेट मैदानमा फागुन २२ गतेबाट २९ गतेसम्म सञ्चालन हुनेछ।’
यो प्रतियोगितामा पछिल्लो समय सम्पन्न प्रधानमन्त्री कप राष्ट्रिय क्रिकेटमा सम्मिलित चार सेमिफाइनलिस्ट टिमसँगै काठमाडौं महानगरपालिकाको अर्को टिम बनाइने छ।
प्रधानमन्त्री कपमा त्रिभुवन आर्मी, नेपाल पुलिस र एपीएफ तीन विभागीय टिमसँगै बागमती प्रदेश सेमिफाइनल पुगेका थिए।
काठमाडौंको टिममा प्रधानमन्त्री कपका उत्कृष्ट प्रदर्शन गरेका बाँकी टिमका खेलाडी संयोजन गरी बनाइने क्यानले बताएको छ।
पिएम कपमा विभागीय र बागमतीसहित प्रदेश १, प्रदेश २, गण्डकी, लुम्बिनी, कर्णाली र सुदूरपश्चिम टिमको सहभागिता थियो।
एकदिवसीय प्रतियोगिता सिंगल राउन्ड रोविन शैलीमा हुने आयोजक क्यानले बताएको छ। जसमा शीर्षस्थानका दुई टिम फाइनलमा पुग्नेछन्।