काठमाडौं– सर्वोच्च अदालतले चिकित्सा शास्त्रतर्फ स्नातकोत्तर (पीजी) तर्फका मेरिट लिस्टबाट हटाइएका चिकित्सकको प्रक्रिया अगाडि नबढाउन आदेश जारी गरेको छ।
चिकित्सा शिक्षा आयोगले फागुन ५ गते परीक्षामा सहभागी भई उत्तीर्ण भएका ३६ चिकित्सकहरुले झुटो विवरण पेश गरेको भन्दै मेरिट लिस्टबाट हटाउने निर्णय गरेको थियो।
आयोगको सो निर्णयप्रति असन्तुष्टि जनाउँदै फागुुन ९ मा केही चिकित्सकले आयोगको निर्णय खारेज गर्न माग गर्दै रिट दायर गरेका थिए। आयोगले दुर्गममा काम गरेको भन्दै गलत विवरण पेश गर्ने ४९ जना परीक्षार्थीलाई मेरिट सूचीबाट हटाएको थियो।
सर्वोच्चका न्यायाधीश कुमार रेग्मीको एकल इजलासले १७ फागुनमा दुवै पक्षलाई छलफलको लागि बोलाउनू भन्दै मेरिट लिस्टबाट हटाउने कार्य नगर्न नगराउन आदेश दिएको छ। रिट दायर गर्नेमा डा. करुणा बज्राचार्य, डा कृष्णहरि श्रेष्ठ, डा. सफलतादेवी कोजु र डा. आविष्कार सुवेदी थिए।