पोखरा– घरायसी झगडापछि बाबुको हत्या गरेको आरोपमा कास्कीका रामकृष्ण कामी परेका छन्।
कास्कीको अन्नपूर्ण गाउँपालिका–३ पाउँदुरकोट घर भई हाल पोखरा ३२ को महकुना बस्दै आएका ३४ वर्षीय रामकृष्णलाई प्रहरीले मंगलबार पक्राउ गरेको हो।
उनका बाबु ५८ वर्षीय जुमबहादुर कामीको आइतबार राति घरकै भ¥याङबाट खसेर मृत्यु भएको भन्ने खबर आएपछि प्रहरीले बुझ्ने क्रममा शंका लागेपछि अनुसन्धान थालेको थियो। इलाका प्रहरी कार्यालय डाँडाको नाकको प्रहरीचौकीबाट खटिएको टोलीले छोरा रामकृष्णलाई पक्राउ गरेको हो ।
जिल्ला प्रहरी कार्यालय कास्कीका प्रवक्ता डीएसपी सुवास हमालका अनुसार घरासयी झगडाका क्रममा रामकृष्णले बाबुलाई ढोकामा लगाउने आग्लो (गजबार) हानेका थिए।
उनको घटनास्थलमै मृत्यु भएको प्रहरीले जनाएको छ। रामकृष्णलाई कर्तव्य ज्यान मुद्दामा म्याद थपेर अनुसन्धान थालिएको प्रहरीले जनाएको छ।