विप्लव समूहका नेता धर्मेन्द्र बास्तोलालाई रिहा गर्न सर्वोच्च अदालतको आदेश

काठमाडौं– सर्वोच्च अदालतले सरकारद्वारा प्रतिबन्धित नेत्रविक्रम चन्द ‘विप्लव’ नेतृत्वको नेकपाका नेता धर्मेन्द्र बास्तोलालाई रिहा गर्न आदेश दिएको छ। 

न्यायाधीशद्वय मीरा खड्का र सुष्मालता माथेमाको संयुक्त इजलासले बास्तोलालाई थुनामुक्त गर्न आदेश दिएको हो। बास्तोलाको तर्फबाट अनिमा बास्तोलाले बन्दी प्रत्यक्षीकरण रिट दायर गरेकी थिइन्।

यसअघि नै अदालतले छाड्न आदेश गरे पनि पुनः पक्राउ गरेर महानगरीय प्रहरी वृत्त, सिंहदबारमा राखिएको थियो।

‘निवेदकलाई थुनामा राख्दा बाध्यात्मक रुपमा पालना गर्नुपर्ने कानुन कार्यविधि पालना नगरी म्याद थप माग गर्दा र दिँदा के कुन प्रयोजनको लागि म्याद थप गरिएको हो भन्नेसम्म पनि उल्लेख नगरी केवल फरक विचार र आस्था राखेको कारण पक्राउ गरेको देखिँदा निजलाई थुनामा राख्ने कार्य न्यायिक दृष्टिकोणबाट उचित नदेखिएकोले यी निवेदक धर्मेन्द्र बास्तोलालाई आजै गैरकानूनी थुनाबाट मुक्त गरिदिनु भनी बन्दी प्रत्यक्षीकरणको आदेश जारी गरिएको छ,’ सर्वोच्चको आदेशमा भनिएको छ।

निवेदकलाई बिनाकारण थुनामा राखेकोमा अघि पनि बन्दी प्रत्यक्षीकरणको आदेश जारी भएकोमा निज मुक्त नभई हालसम्म थुनामा रहेको देखिएको भन्दै इजलासले अब पनि सोही विषयमा पक्राउ गरिएमा विपक्षीलाई कारवाही हुने आदेश पनि गरेको छ।