इन्धन अपचलन रोक्न आयल निगमको निर्देशन, जर्किनमा बिक्री गर्न निषेध

काठमाडौं– नेपाल आयल निगमले इन्धन अपचलन रोक्न मातहतका डिपो तथा कार्यालयलाई निर्देशन दिएको छ। 

निगमले सीमा नाकाहरुमा हुने अपचलन रोक्नका लागि कार्ययोजनासहित सावधानी अपनाउन निर्देशन दिएको हो। निगमका विराटनगर, अमलेखगन्ज, थानकोट, पोखरा, भैरहवा, सुर्खेत, धनगढी, नेपालगन्ज, जनकपुर, वीरगन्ज र चारआली डिपो तथा कार्यालयलाई यस्तो निर्देशन दिइएको निगम प्रवक्ता विनितमणि उपाध्यायले जानकारी दिए। 

‘हाम्रा कार्यालयहरुलाई अपचलन हुन नदिनु भनेर स्पष्ट रुपमा भनेका छौं,’ प्रवक्ता उपाध्यायले भने। उनका अनुसार अब निगम मातहतका कार्यालय एवं डिपोहरुले दैनिक ५ वटा पेट्रोल पम्प अनुगमन गुर्नपर्ने छ। अनुगमन निरिक्षण गरी आफ्नो बिक्री क्षेत्रभित्र परेका तथा नेपाल–भारत सीमा नाकादेखि हुलाकी राजमार्गसम्मका पम्पहरु, हुलाकी राजमार्गस्थित पेट्रोल पम्पहरु तथा हुलाकी राजमार्गबाट उत्तरतर्फ ५ किलोमिटर क्षेत्रभित्रका पेट्रोल पम्पको बिक्री अनुगमन गरी आवश्यक विवरण लिनुपर्ने छ।

पम्प सञ्चालकले दैनिक औसत माग महिनाको सुरुमै निगमको नजिकको कार्यालयमा उपलब्ध गराउनुपर्ने छ ।

त्यस्तै बिक्रेताले खुद्रा एवं थोक बिक्रीको परिमाण घोषणा गर्नुपर्ने तथा उक्त विवरण डिस्पेन्सिङ मिटर तथा थोक खरिदकर्ताको बिल बिजक पुष्टि गराउनुपर्ने निर्देशनमा भनिएको छ।

डिपोहरुले पम्पको भण्डारण क्षमताभन्दा बढीको तेल बिक्री गर्नुपर्ने अवस्थामा निगम केन्द्रीय कार्यालयको अनुमति लिनुपर्ने छ ।

बिक्रेताले ड्रम, जर्किन तथा अन्य भाँडामा पेट्रोल, डिजेल बिक्री वितरण गर्नमा निषेध गरिएको छ। पानी तान्ने मेसिन तथा अन्य कृषि उपकरणमा प्रयोग गर्नका लागि जर्किनमा बिक्री गर्नु परेमा पेट्रोल पम्पहरुले किसानका लागि आवश्यक मासिक परिमाण पहिले नै घोषणा गर्नुपर्ने र लगत राखी बिक्री गर्नुपर्ने निगमको निर्देशन छ।

बिक्रेताले इन्धन खरिद विवरण अद्यावधिक राख्नुपर्ने, गाडीको फ्युल ट्यांकीमा मात्रै इन्धन भर्नुपर्ने र भारतीय ठूला सवारी साधनका फ्युल ट्यांकीमा बढीमा सय लिटरसम्म मात्रै इन्धन दिनुपर्ने निगमले जानकारी दिएको छ।

निगमले दिएको निर्देशन कुनै बिक्रेताले पालना नगरेमा पेट्रोलियम पदार्थ बिक्रेता विनिमावली २०७५ बमोजिम आवश्यक कारवाहीको लागि केन्द्रमा सिफारिस गर्न मातहतका डिपो तथा कार्यालयलाई निगमले निर्देशन दिएको छ।