शिक्षक किताबखानाका अधिकृत प्रसाईसहित तीन जनाविरुद्ध भ्रष्टाचार मुद्दा

काठमाडौं– सेवाग्राहीसँग घुस लिएको अभियोगमा राष्ट्रिय किताबखाना (शिक्षक) ताहाचलका शाखा अधिकृत धनेश्वर प्रसाई, सवारीचालक सुरेशप्रसाद नेपाल र किताबखानामा क्यान्टिन सञ्चालन गर्ने सुदर्शन न्यौपानेलाई विशेष अदालतमा भ्रष्टाचार मुद्दा दायर गरिएको छ।

पेन्सन कागजात बनाउन आएका सेवाग्राहीसँग काम छिटो गरिदिने भनी अतिरिक्त रकम माग गरिरहेको भन्‍ने उजुरीका आधारमा अख्तियार दुरुपयोग अनुसन्धान आयोग टंगालबाट खटिएको टोलीले सेवाग्राहीबाट ५२ हजार रुपैयाँसहित चालक नेपाल पक्राउ परेका थिए। 
अधिकृत प्रसाईले सेवाग्राहीको काममा आलटाल गरी क्यान्टिन सञ्चालक न्यौपानेलाई सेवाग्राहीसँग ५२ हजार  घुसररिसवत रकम माग गर्न लगाएको अनुसन्धानबाट खुलेको छ।

यसपछि न्यौपानेले भनेअनुरुप चालक नेपालले उक्त घुस रकम लिएको तथ्य पुष्टि हुन अख्तियारका प्रवक्ता नारायणप्रसाद रिसालले जानकारी दिए।

तीनै जनालाई जनही बिगोबापत ५२ हजार रुपैयाँ मागदाबी लिर्इ बुधबार विशेष अदालत, काठमाडौंमा आरोपपत्र दायर गरिएको अख्तियारले जनाएको छ।