विराटनगर– प्रहरीले विराटनगरबाट गाडी तोडफोडमा संलग्न ६ जनालाई पक्राउ गरेको छ। पक्राउ परेकाहरु नेकपाको दाहाल–नेपाल समूहका कार्यकर्ता हुन्।
मोरङ प्रहरीका प्रवक्ता डीएसपी मानबहादुर राईले गाडी तोडफोड गर्दै गर्दा दाहाल–नेपाल समूहका जिल्ला संघर्ष समितिका सह–संयोजक पारुल क्षेत्री र महेन्द्र मोरङ क्याम्पस अनेरास्ववियुका सह–इन्चार्ज उमेश ढुंगानालाई पक्राउ गरिएको बताए।
त्यस्तै तोडफोडमा संलग्न दाहाल–नेपाल समूहका कार्यकर्ता शारदा मैनाली, मीरा दाहाल, संगम चौधरी र चम्पा कार्कीलाई पनि नियन्त्रणमा लिएको जानकारी राईले दिए।
बन्दकर्ताले जिल्ला स्वास्थ्य कार्यालय धनकुटाको बा १ झ ९११८ नम्बरको गाडी विराटनगर महानगरपालिका–२ तीनपैनी चोकमा तोडफोड गरेका थिए। दाहाल–नेपाल समूहका कार्यकर्ताले महेन्द्रचोकमा बा १६ च ४४०४ र विराटनगर–१० रोडशेष चोकमा एउटा भारतीय नम्बर प्लेटको स्कोरपिओ गाडी तोडफोड गरेको डिएसपी राईले बताए।