काठमाडौं- नेकपा दाहाल–नेपाल समूहले आज (बिहीबार) आह्वान गरेको देशव्यापी आमहडतालको काठमाडौंमा आशिंक असर परेका छ।
एकाविहानैदेखि खुला हुने चिया, चमेनागृहरु खुलेका देखिँदैनन् भने सवारी, यातायात अघिल्लो दिनको तुलनामा निकै कम चलेका छन्।
सरकारले बुधबार विज्ञप्ति निकालेर ‘नेकपाका नामबाट विविध विषयहरू उठाई मिति २०७७।१०।२१ गते साँझ मसाल जुलुस र २०७७।१०।२२ गते देशव्यापी आमहडताल आव्हान गरिएको भनी सार्वजनिक भएको प्रेस वक्तव्य उपर गृह मन्त्रालयको ध्यानाकर्षण भएको छ’, भन्दै पेशा, व्यवसाय निर्धक्क भएर सञ्चालन गर्न आह्वान गरेको थियो।
आमरुपमा सरकारको उचित सुरक्षा व्यवस्था मिलाउने विज्ञप्तिमा उल्लेख भए पनि राजधानीका शाखा र भित्री सडकमा भने यो समाचार लेख्दासम्म सुरक्षा निकायको उपस्थिति भने निकै न्यून देखिएको छ।
एकाविहानै पेशा व्यवसायमा घरबाट निस्कनेहरु ‘पर्ख र हेर’को मनस्थितिमा देखिएका छन्। दाहाल–नेपाल समूहले बन्द आह्वान गरेको र सरकारले नियमित दैनिकी अपनाउन आह्वान गर्दै प्रधानमन्त्री केपी ओली शर्मा पक्षले बुधबार मोटरसाइकल र्याली समेत निकालेकाले अधिकांश नागरिक अलमलको अवस्थामा देखिएका हुन्।