कृषिमा वैदेशिक लगानीविरुद्ध थप आन्दोलन घोषणा

काठमाडौं– सरकारले कृषि क्षेत्रमा वैदेशिक लगानी खुला गरेसँगै त्यसको विरोध भइरहेको छ। विभिन्न किसान संघसंगठनहरुले त्यसको विरोध गरिरहेका छन्। 

यसैबीच राष्ट्रिय कृषक समूह महासंघले पनि कृषिमा विदेशी लगानी खुला गरिएको विरोधमा आन्दोलन घोषणा गरेको छ। महासंघले बुधबार दिउँसो शान्तिपूर्ण विरोध कार्यक्रम गरिने जानकारी दिएको छ।

महासंघका अध्यक्ष नवराज बस्नेतका अनुसार बुधबार दिउँसो २ घण्टा वैदेशिक लगानी खुला गरिएको सम्बन्धमा विरोध कार्यक्रम आयोजना गरिएको छ।

सरकारले विगतमा रोक्का गरेको कृषि क्षेत्रमा वैदेशिक लगानी राजपत्रमा सूचना प्रकाशित गर्दै खुला गरेको छ। तर, सर्वोच्च अदालतले कृषि क्षेत्रमा वैदेशिक लगानी खुला गर्ने निर्णय तत्काल कार्यान्वयन नगर्न अल्पकालिन आदेश दिइसकेको छ।