काठमाडौं– नेपाली कांग्रेसले बागमती प्रदेशमा आफूलाई मुख्यमन्त्री दिने समूहसँग सहकार्य गर्ने भएको छ।
आज शुक्रबार सभापति शेरबहादुर देउवाको निवास बूढानीलकण्ठमा भएको बागमती प्रदेशबाट केन्द्रीय समितिमा प्रतिनिधित्व गर्ने नेताहरुको बैठकमा मुख्यमन्त्री दिने समूहसँग मिल्नेबारे छलफल भएको हो।
बागमती प्रदेशमा आज नेकपाको दाहाल–नेपाल समूहले मुख्यमन्त्री डोरमणि पौडेलविरुद्ध अविश्वासको प्रस्ताव दर्ता गर्दैछ।
अविश्वासको प्रस्ताव दर्ता भएपछि रणनीति बनाउन बसेको कांग्रेस बैठकमा देउवाले मुख्यमन्त्री दिने समूहसँग मिल्नुपर्ने बताएका छन्।
तर, यसबारेमा अन्तिम निर्णय भने भएको छैन। बागमती प्रदेश संसदीय दलका नेता इन्द्र बानियाँलाई काठमाडौं बोलाएर छलफल गरिने र सोही छलफलमा अन्तिम निर्णय हुने बैठकमा सहभागी एक नेताले जानकारी दिए।