काठमाडौं- मानवसेवा आश्रमले सञ्चालन गरेको एक महिनाले ‘मेचीमहाकाली सडक यात्रा’का क्रममा ६०० जनाको उद्धार गरेको छ।
आश्रमले सडकमा रहेका असहाय, अशक्त, बेसहारा तथा मनोरोगीको उद्धार गरी पालनपोषण तथा उपचारपछि परिवारमा पुनःमिलन गराउँदै आएको छ।
पूर्वको मेचीदेखि पश्चिम महाकालीसम्मका सडकबाट यसरी झण्डै ६०० असहायको उद्धार गरी संरक्षण दिइएको आश्रमका अध्यक्ष रामजी अधिकारीले जानकारी दिए।
पुस ७ गते प्रधानमन्त्री केपी शर्मा ओलीबाट घोषणा भई ८ गतेदेखि सुरु भएको उद्धार अभियानको ३०औं दिनमा काठमाडौं आइपुगेको मेचीमहाकाली सडक यात्री टोलीको स्वागत समारोहमा अध्यक्ष अधिकारीले नेपाललाई बेसहारा सडकमानवमुक्त बनाउने अभियानको आधार तयार भएको जानकारी दिए।
२०६९ भदौ १३ गते हेटौंडाबाट उद्धार अभियान सुरु गरेको आश्रमले अहिले सात प्रदेशका १५ जिल्लाका २२ शाखामार्फत् मानवीय सेवा गर्दै आएको छ, जहाँ अहिले एक हजार ८०० आश्रित छन्।
यसअघि एक हजार ५०० भन्दा बढीलाई उद्धार गरी परिवारमा पुनःमिलन गराइसकिएको जनाइएको छ। रासस