काठमाडौं- प्रधानमन्त्री (पीएम) कप पुरुष एक दिवसीय क्रिकेट अन्तर्गत आज (शनिबार) को खेलमा सशस्त्र प्रहरीको विभागीय टिम एपीएफ विजयी भएको छ।
कीर्तिपुरस्थित त्रिवि मैदानमा सम्पन्न खेलमा एपीएफले प्रदेश १ विरुद्ध १३५ रनको जित निकालेको हो।
टस हारेर ब्याटिङको निम्तो पाएको एपीएफले ४८.४ ओभरमा सम्पूर्ण विकेट गुमाएर २४३ रन बनाएको थियो। जवाफी ब्याटिमा आएको प्रदेश १, ४२ ओभर चार बलमा १०८ रन बनाएर आल आउट भएपछि खेलमा एपीएफले जित निकालेको हो।
जितका लागि एपीएफका आरिफ शेखले ५९ रनको अर्धसतकीय पारी खेले भने बसन्त रेग्मीले ४० र सन्दीप जोराले १४ रन बनाए।
प्रदेश १ का लागि फिर्दोस अन्सारी, दीपेश कँडेल, हेमन्त राई र श्रवण यादवले समान २–२ विकेट लिए। जवाफी ब्याटिङमा आएको प्रदेश १ का मिनास थापाले १८ रन बनाए भने दिपेश कँडेलले १६ रन जोडे।
प्रदेश १ लाई सस्तैमा समेट्न अभिनास बोहराले ५ विकेट लिए भने बसन्त रेग्मीले दुई विकेट गिराए।
जितसँगै दुई अंक जोडेको एपीएफ समूह ए को शीर्षस्थानमा छ भने त्रिभुवन आर्मी क्लब समान दुई अंकका साथ दोस्रो स्थानमा छ।
सोही समूहका गण्डकी प्रदेश र प्रदेश १ ले अंक जोड्न सकेका छैनन्।