काठमाडौं– राजनीतिक रुपमा विभाजित नेकपाको दाहाल–नेपाल समूहका अध्यक्ष माधवकुमार नेपालले केपी शर्मा ओलीले गल्ती, कमजोरी सच्याएर सही बाटोमा फर्कन सक्ने अझै ठाउँ रहेको बताएका छन्।
गण्डकी प्रदेश कमिटीले पोखरामा आयोजना गरेको बृहद् कार्यकर्ता भेलालाई सम्बोधन गर्दै अध्यक्ष नेपालले अझै सच्चिन सक्ने ठाउँ रहेको बताएका हुन्।
‘केपी ओलीजी तपाईंले बाटो बिराउनुभएको छ। गल्ती, कमीकमजोरीलाई सच्चाएर अझै फर्किन सक्नु हुनेछ,’ उनले भने, ‘भोलि नत्र इतिहासको रछ्यानमा तपाईं रहनुहुनेछ।’
अध्यक्ष नेपालले प्रतिनिधिसभा विघटन गरेर गल्ती गरेको, जनताको अपमान गरेको भन्दै ओली सच्चिएर आए त्यसले राजनीतिक अर्थ राख्ने बताए।
‘हुन न त वामदेव गौतमजी लागिरहनुभएको छ,’ उनले भने, ‘तर, उहाँलाई सुधार्न सकिन्न। उहाँ आफू भाँचिन तयार हुने तर नसच्चिने मानिस हो।’
केपी ओलीको किचलोका कारण अहिलेको समस्या निम्तिएको भन्दै नेपालले उनको स्वेच्छाचारी र अराजकताका नै प्रमुख कारक भएको बताए।
‘किचलो हामीले खडा गरेका होइनौं, केपी ओलीले नै हो खडा गरेको हो,’ उनले भने, ‘अहिले देशको यस्तो अवस्था आउनमा उहाँ नै मुख्य जिम्मेवार हो।’
देशलाई अस्थिरतातर्फ लैजाने काम केपी ओलीबाट भएको भन्दै उनले अब संघर्षलाई निरन्तर अघि बढाउनुपर्ने धारणा राखे।
‘विरोधीलाई तर्साएर तह लगाउन सुरुदेखि नै उहाँले खेल सुरु गर्नुभयो,’ नेपालले भने, ‘केपी ओलीमा इमान पनि छैन। न देश र जनताको पक्षमा काम गर्ने सोच छ।’