आर्सनल र युनाइटेड एफए कपको चौथो चरणमा

काठमाडौं- न्युकासललाई हराउँदै आर्सनल एफए कपको चौथो चरणमा प्रवेश गरेको छ।

शनिबार रातिको खेलमा न्युकासललाई २-० गोलले हराउँदै आर्सनलले चौथो चरणमा प्रवेश पाएको हो।

निर्धारित ९० मिनेटसम्म बराबरी भएपछि थपिएको अतिरिक्त समयमा मात्र आर्सनल गोल गर्न सफल भयो।

इमिली स्मिथ रोवले खेलको १०९ मिनेटमा गोल गरे भने कप्तान पियरे इमिरेक अबुमयाङले खेलको ११७ मिनेटमा गोल गर्दै आर्सनललाई जित दिलाए।

यता वाटफोर्डविरुद्ध साँघुरो जित निकाल्दै म्यानचेस्टर युनाइटेड पनि एफए कपको चौथो चरणमा प्रवेश गरेको छ।

वाटफोर्टविरुद्ध जितका लागि युनाइटेडका स्कट म्यान टमीले निर्णायक गोल गरे। टमीले पाँचौ मिनेटमा गरेको गोल नै खेलको निर्णायक बन्यो।

त्यस्तै शनिबार रातिको खेलमा लेस्टर सिटी, सेफिल्ड युनाइटेड र बर्नेमाउथले पनि जित निकालेका छन्।