काठमाडौं- कोरोना भाइरस सङ्क्रमित बढ्दै गएका कारण इङ्ल्याण्डका अस्पताल प्रमुखहरूले शय्या व्यवस्थानमा कठिनाइ भएको बताएका छन्।
स्वास्थ्य सेवा प्रदायक तथा चिकित्सकहरूले अपेक्षाकृत सकारात्मक सुधार देखिँदा पनि लन्डनका अस्पतालहरू दुई हप्ताभित्रमा क्षमताभन्दा बढी बिरामी हेर्नुपर्ने अवस्था आउन सक्ने प्रशासनलाई बताएको गोप्य स्रोतलाई उल्लेख गर्दै एएफपीले समाचारमा जनाएको छ।
बेलायतमा बुधबार ६२ हजारभन्दा बढी व्यक्तिमा कोभिड-१९ भएको उल्लेख गरिएको छ। दक्षिणपूर्वी इङ्ल्याण्डमा कोभिड सङ्क्रमितको सङ्ख्यामा नाटकीय वृद्धि देखिएको छ। यो क्षेत्र हालै नयाँ प्रकारको कोभिड-१९ का जिवाणु पाइएको क्षेत्र बताइएको छ।
बेलायतका अस्पतालमा भर्ना भई उपचार गराइरहेका कोभिड-१९ का सङ्क्रमितको सङ्ख्या ३० हजारभन्दा बढी पुगेको छ। यो पहिलो चरणको सङ्क्रमणका समयको भन्दा बढी हो।
इङ्ल्यान्डका अस्पतालहरूको प्रतिनिधित्व गर्ने एनएचएस प्रमुखले भने, ‘संक्रमणको तीव्र वृद्धिले अस्पतालका उपचाररत केही विरामीहरूलाई नर्सिंग होम वा केयर होममा केही थप शय्या व्यवस्थापन गरी सार्न बाध्य तुल्याएको अस्पताल सञ्चालकहरूले बताएका छन्।’
क्रिस होपप्सनले बीबीसी रेडियोसँग भनेका छन्, ‘हामीले विगत एक हप्तामा इङ्ल्याण्डमा मात्र पाँच हजार नयाँ बिरामीलाई भर्ना गरेका छौँ। यो कोभिड-१९ का बिरामीका लागि छुट्याइएका शय्याभन्दा १० गुणा बढी हो। साँच्चै यो निकै चुनौतीको विषय हो।’