इलाम- इलामको माङ्सेबुङ गाउँपालिका २ भोटेडाँडामा ट्रक दुर्घटना हुँदा एक जनाको मृत्यु भएको छ।
रवि–दमक सडक खण्डमा रविबाट काठको गोलिया बोकेर दमकतर्फ जाँदै गरेको ना ३ ख २०५ नम्बरको ट्रक दुर्घटना भएको हो। उक्त दुर्घटनामा परि पाँचथर मिक्लाजुङ गाउँपालिका बस्ने ३५ वर्षीय किरण राईको मृत्यु भएको प्रहरीले जनाएको छ।
अनियन्त्रित भई ट्रक सडकबाट करिब २ सय मिटर तल खस्दा राई घाइते भएका थिए। उपचारका लागि लग्ने क्रममा उनको मृत्यु भएको जिल्ला प्रहरी कार्यालय इलामका सूचना अधिकारी प्रहरी नायब उपरीक्षक लालध्वज सुवेदीले जानकारी दिए।
चालक ताप्लेजुङ मेले गाउँपालिका१ का २० वर्षीय प्रमोद श्रेष्ठलाई इलाका प्रहरी कार्यालय दमकले नियन्त्रणमा लिएर अनुसन्धान गरिरहेको छ।