सांसदको प्रश्न- घरझगडा भयो भनेर घरमै आगो लगाइदिने ?

काठमाडौं- जनता समाजवादी पार्टीका सांसद मृगेन्द्र कुमार सिंह यादवले प्रधानमन्त्रीले घर झगडा मिलाउन नसकेर प्रतिनिधिसभा विघटन गरेको भन्दै आलोचना गरेका छन्।

राष्ट्रियसभा बैठकमा बोल्दै उनले प्रधानमन्त्रीले घेराबन्दीमा परेको बाहनामा संसद विघटन गर्नु अलोकतान्त्रिक र कमजोर मानसिकताको उपज भएको बताए।

उनले भने, ‘अविश्वासको प्रस्ताव फेस गरेको भए बहादुरीको काम हुन्थ्यो। घरमा झगडा भयो आगो लगाइदिने ? घेराबन्दीमा पारियो भनियो कसले गर्यो घेराबन्दी ?’

उनले प्रधानमन्त्रीको राम्रो प्रस्तावमा आफूहरुको सदैव सहयोग रहेको स्मरण गरे। उनले भने, ‘चुच्चे नक्सामा प्रस्ताव राख्नुभयो सर्वसम्मतिले साथ दियो। कहाँ घेराबन्दी गरियो प्रतिनिधिसभाले कुन विषयमा घेराबन्दी गर्‍यो ? यो अलोकतान्त्रिक कदम हो। सरकारले फिर्ता लिओस्, लिन मिल्छ भने।’