बागमती प्रदेश लोकसेवाले एकैपटक माग्यो ११ सय ५२ कर्मचारी 

काठमाडौं- बागमती प्रदेशको प्रदेश लोकसेवा आयोगले एकैपटक ठूलो संख्यामा कर्मचारी मागेको छ ।

प्रदेश लोकसेवा कार्यालयले आज विज्ञापन प्रकाशित गर्दै एकै पटक ११ सय ५२ कर्मचारीका लागि आवेदन मागेको हो । बागमती प्रदेशका चार वटा मन्त्रालय र प्रदेशका ६२ वटा पालिकामा रिक्त रहेका पदका लागि  आवेदन मागिएको प्रदेश लोकसेवा आयोगले जनाएको छ । 

प्रदेश लोकसेवा आयोगले खुल्लातर्फ ५ सय ३८ जना, ज्येष्ठतातर्फ ४ सय ७ जना, कार्यक्षमतातर्फ एक सय ९६ जना, आन्तरिक प्रतियोगितातर्फ ९ जना, कार्यसम्पादनतर्फ २ जना माग गरेको छ ।

बागमती प्रदेश लोकसेवा आयोगले यसअघि पनि चौथो तहका ४ सय ६९ जना कर्मचारी माग गरेर आवेदनसमेत लिएको छ ।