माघबाट चल्ने भयो रेल, भारतबाट २६ कर्मचारी आउने

काठमाडौं- भारतबाट करिब ३ महिनाअघि नेपाल ल्याएको रेल माघबाट सञ्चालनमा आउने भएको छ । 

रेल मार्गको आवश्यक मर्मत, कर्मचारीलाई तालिम र सफ्टवेयरको काम सकिएसँगै माघबाट रेल चलाउने तयारी भएको हो । भारतले निर्माण गरेको संरचना १५ देखि २० दिनमा तयार भएपछि रेल चलाउने तयारी भएको रेल्वे कम्पनीले जनाएको छ । 

जयनगर कुर्था रेलमार्गमा रेल चलाउनका लागि गत असोज महिनामै रेल ल्याइएको थियो । तर, कोरोनाको महामारी कम नभएका कारणले तीन महिनादेखि पालले छोपेर राखिएको थियो । 

रेलमार्गको मर्मत र कर्मचारीलाई तालिम दिन बाँकी रहेका कारणले पनि रेल सञ्चालमा आउन सकेको थिएन् । रेल्वे कम्पनीले रेल चलाउने ज्ञान भएका दक्ष २६ जना भारतीय कर्मचारी ल्याउन लागेको छ । नेपालमा रेलसम्बन्धी अनुभव भएका जनशक्ति नभएकाले भारतीय कर्मचारी करारमा ल्याउन लागिएको कम्पनीले जनाएको छ । 

यस्तै रेल्वे कम्पनीमा यसअघिका झण्डै ६० जना अस्थायी कर्मचारी र १२ जना स्थायी कर्मचारी पनि काममा खटिने भएका छन् । ती कर्मचारी कम्पनी बन्द भए पनि कम्पनीमा रहेका थिए ।

सरकारले यस रेलमार्ग बर्दिवाससम्म पुग्ने र पूर्वपश्चिम रेलमार्ग पनि बर्दिवास जाने भएकाले त्यहाँ पुगेर जोड्ने योजना लिएको छ ।