कोभिड विशेष अस्पतालको सूचीबाट निजी अस्पताललाई हटाइयो 

काठमाडौं– स्वास्थ्य तथा जनसंख्या मन्त्रालयले सबै निजी अस्पतालहरुलाई कोभिड–१९ विशेष अस्पतालको सूचीबाट हटाउने निर्णय गरेको छ। 

मन्त्रालयका प्रवक्ता डा. जागेश्वर गौतमका अनुसार इन्सिडेन्ट कमान्ड सिस्टमको आइतबारको बैठकले अर्को निर्णय नभएसम्म सबै निजी अस्पताललाई हटाउने निर्णय गरेको हो। 

मेडिकल कलेजहरु भने कोभिड–१९ विशेष अस्पतालको सूचीमा कायमै रहने डा. गौतममले जानकारी दिए। विशेष अस्पतालको सूचीबाट हटेपछि ती अस्पतालले कोरोना संक्रमितको उपचारबापत मन्त्रालयलबाट बिरामीको उपचारबापत शोधभर्ना पाउनेछैनन्। 

आइतबारबाट लागू हुनेगरी सबै निजी अस्पतालहरुलाई कोभिड–१९ विशेष अस्पतालको रुपमा नरहने व्यवस्था गरिएको भन्दै डा. गौतमले निजी अस्पतालमा भर्ना भएर उपचाररत बिरामीहरुको हकमा भने अबको १० दिनसम्मको  उपचारबापतको रकम स्वास्थ्य मन्त्रालयले दिने बताए।

साथै राष्ट्रिय जनस्वास्थ्य प्रयोगशालाले संकलन गरेको स्वाब आजदेखि नै निजी प्रयोगशालामा स्वाब नपठाउने निर्णय भएको प्रवक्ता गौतमले जनाकारी दिए।

पछिल्लो समय कोरोनाको नयाँ भाइरस फेला परेको बेलायतबाट फर्किएका २७७ जनाको पीसीआर परीक्षण गर्ने र जिन सिक्वेन्सिङको व्यवस्था स्वास्थ्य सेवा विभागले गर्ने निर्णय भएको मन्त्रालयले जनाएको छ।