नेकपा संकट : ओलीविरुद्ध रणनीति बनाउन छलफल गर्दै दाहाल–नेपाल समूह

काठमाडौं– प्रधानमन्त्री केपी ओलीले प्रतिनिधिसभा विघटन गरेर मध्यावधि निर्वाचन घोषणा गरेपछि त्यसविरुद्ध रणनीति तय गर्न नेकपाको दाहाल–नेपाल पक्षको बैठक बसिरहेको छ। 

कार्यकारी अध्यक्ष पुष्पकमल दाहाल, वरिष्ठ नेता माधवकुमार नेता र झलनाथ खनालसहित नेताहरुसहित विघटित प्रतिनिधिसभाका सदस्यहरु बानेश्वरस्थित संसद् भवनमा भेला भएका हुन्।

प्रधानमन्त्री ओलीको पछिल्लो कदमविरुद्ध कडा रुपमा उत्रिएका उनीहरुले थप कदम चाल्न छलफल गर्न लागेका हुन्। सांसदहरुको भेलापछि प्रचण्ड पक्षका स्थायी कमिटी सदस्यको पनि बैठक बस्ने कार्यक्रम छ।

हिजो आइतबार साँझ प्रधानमन्त्री निवास बालुवाटारमा बसेको नेकपा स्थायी कमिटी बैठकले अध्यक्ष ओलीलाई अनुशासनको कारवाही गर्ने निर्णय गरेको थियो। यसका लागि केन्द्रीय कमिटीमा प्रस्ताव लैजाने स्थायी कमिटीको निर्णय छ। केन्द्रीय कमिटी बैठक भोलि मंगलबारलाई डाकिएको छ।

प्रधानमन्त्री ओलीले संसद् विघटन गरेर मध्यावधि चुनावको घोषणा गरेसँगै राजनीति गर्माएको हो। ओलीको कदमको विरोधमा सत्तारुढ दल नेकपाको प्रचण्ड पक्ष, प्रमुख प्रतिपक्षी दल नेपाली कांग्रेस, अन्य प्रतिपक्षी दलहरुलगायत सबैतिरबाट आलोचना भइरहेको छ। 

मन्त्रिपरिषद्को सिफारिसमा राष्ट्रपति विद्यादेवी भण्डारीले प्रतिनिधिसभा विघटन गरेपछि ओली सरकारका ७ जना मन्त्रीले हिजै राजीनामा घोषणा गरेका छन्।

राजीनामा घोषणा गर्ने मन्त्रीहरुमा शिक्षामन्त्री गिरिराजमणि पोखरेल, पर्यटनमन्त्री योगेश भट्टराई, कृषिमन्त्री घनश्याम भुषाल, उर्जामन्त्री वर्षमान पुन, खानेपानी मन्त्री बिना मगर, वनमन्त्री शक्ति बस्नेत र श्रममन्त्री रामेश्वर राय यादव छन् । 

आजै बिहान ओली पक्षका नेताहरुको बैठक बालुवाटारमा बसेको थियो।