कम्युनिस्ट पार्टी सत्ता सञ्चालन गर्न असक्षम : कांग्रेस

काठमाडौं– नेपाली कांग्रेसले केपी ओली नेतृत्वको सरकारले संसद् विघटन गरेर मुलुकलाई अस्थिरता, अनिश्चितता, अराजकता र असफलतातर्फ लैजाने गम्भीर षडयन्त्रमूलक काम गरेको ठहर गरेको छ।

कांग्रेस केन्द्रीय कार्यसमितिका पदाधिकारी एवं पूर्व पदाधिकारीहरुको आइतबार बसेको बैठकले सरकारको यस्तो कदमलाई लोकतान्त्रिक मूल्यमान्यता र संवैधानिक व्यवस्था प्रतिकूलल बदनियतपूर्ण निन्दनीय कार्य रहेको निष्कर्ष निकालेको हो।

बैठकको निर्णयमा भनिएको छ, 'विगतको निर्वाचनमा स्थिरता, शान्ति र संमृद्धिको नारा दिएर झन्डै दुई तिहाई जनमत प्राप्त गरेको सरकारले जनादेशको अपमान गरेको छ।’

कोभिड—१९ को माहामारीले जनता पीडामा रहेको अवस्थामा नेपाल कम्युनिष्ट पार्टीको सरकार जनताका जनजीवीका र सुविधाका विषयबाट विमुख र निरपेक्ष हुँदै आफ्नो पद र शाक्तिका लागि सत्ता संघर्षमा केन्द्रित रहेको आरोप कांग्रेसको छ।  

निर्णयमा उल्लेख छ, ‘पछिल्ला घटनाक्रमले कम्युनिस्ट पार्टी र सरकार देश र जनताका हितमा सत्ता सञ्चालन गर्न अक्षम र जनताप्रति गैरजिम्मेवार र अनुत्तरदायी रहेको प्रस्ट छ।’ 

कांग्रेसले प्रारम्भदेखि नै असफलतातर्फ उन्मुख सरकारको पछिल्लो कदम संवैधानिक मूल्य र लोकतान्त्रिक मान्यताविपरीत कार्यहरुको शंखृलाको निरन्तरता भनेको छ।

कांग्रेस निर्णयमा भनिएको छ, ‘नेपाली कांग्रेसको यो बैठक नेपाल कम्युनिस्ट पार्टी र सरकारका कारण उत्पन्न यो असहज परिस्थितिमा नेपाली जनता सामु नेपालको संघीय लोकतान्त्रिक गणतन्त्रात्मक संसदीय शासन व्यवस्था र संविधानको संरक्षण गर्दै मुलुकलाई सही मार्गमा डोर्याउन आफ्ना सबै प्रयत्न केन्द्रित गर्ने प्रतिबद्धता व्यक्त गर्दछ।’

सभापति शेरबहादुर देउवाको नेतृत्वमा संसदमा क्रियाशील अन्य राजनीतिक दलहरुसँग समन्वय र सल्लाह गरी लोकतान्त्रिक पद्धतिको संरक्षणका लागि कार्य गर्ने निर्णय कांग्रेसको छ।