नेकपा विवाद : भदौ २६ मा फर्कने सहमति 

काठमाडौं–सत्तारुढ नेकपा भदौ २६ को स्थायी कमिटी बैठकको निर्णयलाई आधार मान्दै अगाडि बढ्ने भएको छ।

बालुवाटारमा अध्यक्ष एवम् प्रधानमन्त्री केपी ओली, कार्यकारी अध्यक्ष पुष्पकमल दाहाल र महासचिव विष्णु पौडेलबीच भएको छलफलमा यस्तो सहमति भएको हो।

तीन नेताबीच भदौ २६ पछि पार्टीमा पेस भएका राजनीतिक प्रतिवेदन (आरोपपत्र) र प्रधानमन्त्री ओलीले ल्याएको संवैधानिक परिषद्सम्बन्धी अध्यादेश फिर्ता लिने सहमति भएको बालुवाटार उच्च स्रोतले बतायो।

भदौ २६ मा सम्पन्न स्थायी कमिटी बैठकले ओलीले पूरै कार्यकाल सरकार चलाउने, अर्का अध्यक्ष दाहालले पार्टीमा कार्यकारी भएर काम गर्ने, पार्टी एकता र शान्ति प्रक्रियाका बाँकी काम पूरा गर्ने, चैतमा एकता महाधिवेशन गर्ने लगायत निर्णय गरेको थियो। 

यस्तै प्रधानमन्त्री ओलीले गर्ने हरेक निर्णय सचिवालय बैठकपछि गर्नुपर्ने र संवैधानिक नियुक्तिलगातका विषयमा दुई अध्यक्षबीच छलफल भएर अघि बढ्ने निर्णय भएको थियो।

यस्तै पार्टीमा उत्पन्न विवाद कमिटीबाटै समाधान गर्ने पनि निर्णय थियो।

बैठकपछि दुई अध्यक्षले अन्तरपार्टी निर्देशन-५ जारी गरेका थिए। 

प्रधानमन्त्री ओलीले यी निर्णयलाई पन्छाउँदै एकलौटी अघि बढेपछि नेकपा विवाद चुलिएको थियो।