विराटनगर– सुनसरीको धरानस्थित बीपी कोइराला स्वास्थ्य विज्ञान प्रतिष्ठानको समस्या सम्वोधनका लागि सरकारले वार्ता टोली गठन गर्ने भएको छ।
प्रधानमन्त्री कार्यालयका सचिव वैकुण्ठ अर्याल नेतृत्वमा बनेको छानबिन समितिले सोमबार प्रधानमन्त्री शेरबहादुर देउवालाई प्रतिवेदन बुझाउँदैछ। छानबिन प्रतिवेदनसँगै सरकारले वार्ता टोली गठन गर्ने तयारी गरेको स्वास्थ्य राज्यमन्त्री उमेश श्रेष्ठले जानकारी दिएका छन्।
सरकारले बनाउने वार्ता समितिले बीपी प्रतिष्ठान धरानको समस्या समाधान निकाल्ने मन्त्री श्रेष्ठले बताए। आन्दोलनरत पक्षले प्रतिष्ठानका पदाधिकारीसँग वार्ता नगर्ने अडानसहित उच्चस्तरीय वार्ता टोलीको माग गर्दै आएका थिए।
प्रतिष्ठानका आन्दोलनकारीले मंगलबार साँझसम्म उच्चस्तरीय वार्ता टोली गठन गरेर सरकारले समस्या समाधानको पहल नथाले बुधबारदेखि काममा नजाने घोषणा गरेका छन्। सरकारलाई आन्दोलनकारीले दिएको ७२ घण्टाको अल्टिमेटम मंगलबार साँझसम्मको छ।
आन्दोलनरत संयुक्त संघर्ष समितिको आह्वान अनुसार अहिले कालोपट्टी बाँधेर काम गरिरहेका आन्दोलनकारीले आइतबार डिन अफिसहरुमा तालाबन्दी गरेका थिए। प्रतिष्ठानमा ४९ दिनदेखि चिकित्सक तथा विद्यार्थीहरु आन्दोलनमा छन्।