झनै बढ्यो चिसो, काठमाडौंकाे तापक्रम ४ डिग्री

काठमाडौं- मौसम सफा भएसँगै शीत पर्ने क्रम बढेसँगै देशभरको चिसो बढेको छ । 

तराईका जिल्लाहरुमा हुस्सु लाग्नुका साथै पहाडी भूभागमा कठ्याग्रिने चिसो बढेको जल तथा मौसम पूर्वानुमान महाशाखाले जनाएको छ। देशभरका अधिकांश स्थानको न्यूनतम तापक्रम घटेको महाशाखा वरिष्ठ मौसमविद् निराजन सापकोटाले जानकारी दिए । 

उनका अनुसार आज काठमाडौं उपत्यकामा यो वर्षकै सबैभन्दा कम तापक्रम मापन भएको छ । बिहान साढे ६ बजे गरिएको मापनअनुसार काठमाडौंको न्यूनतम तापक्रम ४ डिग्री सेल्सियसमा झरेको छ । 

वरिष्ठ मौसमविद् सापकोटाले नेपाल समयसँग भने- 'डिसेम्बर महिनाको अन्त्यसम्ममा निरन्तर चिसो बढ्ने भएकाले काठमाडौं उपत्यकासहित देशैभरको तापक्रम थप घट्ने छ ।' 

काठमाडौं उपत्यकाको हिजो (आइतबार)को तापक्रम ४.५ डिग्री थियो भने जुम्लाको तापक्रम माइनस ३.१ डिग्री, जिरीको तापक्रम माइनस ०.६ डिग्री मापन गरिएको थियो । 

जल तथा मौसम पूर्वानुमान महाशाखाका अनुसार आज देशको पहाडी भू–भागमा आंशिक बदली हुने भएको छ ।

प्रदेश नं १ लगायत देशको पहाडि भू–भागहरुमा हल्का वर्षा हुनुका साथै उच्च पहाडी भूभागमा हिमपातको सम्भावना रहेको मौसमविद् सापकोटाले जानकारी दिए । 

हाल तराईका अधिकांश  भु–भागहरुमा  हुस्सु लागेको छ ।  वायुको  पारदर्शितामा  कमीका कारण सडक तथा हवाई यातायातमा समेत केहि अवरोध आउन सक्ने महाशाखाले जनाएको छ ।