मानव बेचबिखनमा संलग्न महिला पक्राउ

काठमाडौं– गैरकानुनी रुपमा पाँचजनालाई दक्षिण अफ्रिकामा बेचबिखन गरेको अभियोगमा फरार महिलालाई प्रहरीले पक्राउ गरेको छ। 

प्रहरीको केन्द्रीय मानव बेचबिखन ब्युरोले सिन्धुपाल्चोक घर भई काठमाडाैं बस्ने ५० वर्षीया अनिता तामाङ भनिने अनिता सुनुवारलाई पक्राउ गरेको हो।

ब्युरोको टोलीले आइतबार दिउँसो उनलाई काठमाडौंको चाबहिलबाट पक्राउ गरेको हो। 

बेचबिखनमा संलग्न रही फरार ताप्लेजुङका ४३ वर्षीय गणेशकुमार लोंवालाई ब्युरो टोलीले १६ मंसिरमा पक्राउ गरेको थियो। 

३ चैत २०७३ मा पाँच जनालाई वैदेशिक रोजगारीमा आकर्षक तलब दिलाइदिने प्रलोभनमा पारी गैरकानुनी तवरले त्रिभुवन विमानस्थलबाट भारत, दुबई, कतार, मोजाम्बिक हुँदै दक्षिण अफ्रिका पुर्याएर बिक्री गरिएको थियो।

त्यहाँ उनीहरुमाथि शारीरिक, मानसिक र आर्थिक शोषण गरी चार–पाँच महिनासम्म बन्धक बनाई राखिएको थियो। कोही नभएको मौका पारेर बन्धक बनाइएका पाँचैजना भागेर नेपाली दूतावासमा पुगेका थिए। 

त्यसपछि उनीहरुलाई दूतावासले आफन्तसँग सम्पर्क गरेर नेपाल फिर्ता पठाएको थियो।

नेपाल फर्किएपछि पीडितले ब्युरोमा उजुरी दिएका थिए। यसअघि पक्राउ परेका र आज पक्राउ परेका दुवैलाई काठमाडौं जिल्ला अदालतबाट म्याद थप गरेर आवश्यक अनुसन्धान भइरहेको ब्युरोले जनाएको छ।