हिन्दूराष्ट्र पुनर्स्थापनाका लागि सर्वपक्षीय सम्मेलन गरौं : कमल थापा  

हेटौंडा– राष्ट्रिय प्रजातन्त्र पार्टीका अध्यक्ष कमल थापाले कसैलाई पनि निषेध नहुने गरी राजादेखि विप्लव समूहसम्म अट्ने राज्य व्यवस्था आवश्यक भएको बताएका छन्। 

हेटौंडामा बिहीबार पार्टीको चुनाव चिह्न हलो तथा झण्डा अनावरण गर्दै थापाले राजसंस्था र हिन्दूराष्ट्र पुनस्र्थापनाको निमित्त सर्वपक्षीय सम्मेलन हुनुपर्ने माग गरेका हुन्। 

उनले नेपाली जनताको अभिमत र राजनीतिक दलको सहयोगमा  राजसंस्था पुनस्र्थापित हुने बताए। 

गणतन्त्र, धर्म निरपेक्षता र संघीयता विदेशिको एजेन्डा भएको चर्चा गर्दै थापाले जनताले यी विषय विदेशी एजेन्डा भएको बताएका छन्। 
थापाले राजसंस्था र हिन्दूराष्ट्रको माग राखी देशव्यापी जनप्रदर्शन भएकोमा खुसी व्यक्त गरेका छन्। 

राप्रपालाई मुलुकको वैकल्पिक शक्ति बनाउन जनताको सहयोग आवश्यक भएको भन्दै संगठन सुदृढीकरणमा लाग्न थापाले कार्यकर्तालाई निर्देशन पनि दिएका छन्। 

परिवर्तनपछि राजा ज्ञानेन्द्रको शालिन र मर्यादित भूमिका र व्यवहारको पनि थापाले खुलेर प्रशंसा गरे। 

कार्यक्रममा राप्रपा केन्द्रीय सदस्य मधु अधिकारीले व्याप्त विकृती र विसङ्गतीका कारण विद्रोहको अवस्था आएको बताए। 

राप्रपाका युवा नेता राजाराम बर्तौलाले राप्रपा र पार्टी नेतृत्वका कारण एजेन्डाको जग खडा भएको भन्दै राप्रपाको नेतृत्वमा अब आन्दोलनको आँधिबेहरी ल्याउनुपर्नेमा जोड दिए। 

कार्यक्रममा नेताहरु विजय खड्का, नवराज बिष्ट, बालकृष्ण कार्की, रामहरि न्यौपाने, खिल चौलागाईं, ज्ञानेन्द्र ढुङ्गेल, गुरुप्रसाद सापकोटा, इन्दिरा पाठकलगायतले बोलेका थिए।