काठमाडौं– च्याम्पियन्स लिगको समूह चरण अन्तर्गतको खेलमा पेरिस सेन्ट जर्मेन (पीएसजी)ले इस्तानबुल बसाक्षेरविरुद्ध फराकिलो जित निकालेको छ।
पीएसजीको मैदानमा सम्पन्न खेलमा घरेलु टिमले इस्तानबुलविरुद्ध ५–१ गोलको जित निकालेको हो। जितका लागि नेयमारले ह्याट्रिक गरे भने केलियन एम्बाप्पेले दुई गोलको योगदान दिए।
खेलको २१ औं मिनेटमा पहिलो गोल गर्दै अग्रता दिलाएका नेयमारले ३८ औं मिनेटमा दोस्रो गोल गरे।
४२ औं मिनेटमा पेनाल्टीमा पाएको अवसरको सदुपयोग गर्दै एम्बाप्पेले गोल गरेपछि भने पीएसजी पहिलो हाफमै तीन गोलले अघि रह्यो।
दोस्रो हाफमा पनि पीएसजीले दुई गोल थप्यो। ५० औं मिनेटमा नेयमारले व्यक्तिगत तेस्रो गोल गर्दै ह्याट्रिक पूरा गरे भने एम्बाप्पेले ६२ औं मिनेटमा गोल गर्दै खेललाई फराकिलो अन्तरमा पुर्याए।
यसबीच स्तानबुलका मेहमत टोपालले ५७ औं मिनेटमा सान्त्वना गोल गरे।
जितसँगै १२ अंक बनाएको पीएसजी समूहको शीर्षस्थानमा छ। त्यस्तै समान १२ अंक भएको लाइप्जिक दोस्रो स्थानमा रहँदै लिगको अन्तिम १६ मा प्रवेश गरिसकेको छ।
तेस्रो र चौथो स्थानका म्यानचेस्टर युनाइटेड र इस्तानबुल भने समूह चरणबाटै बाहिरिएका छन्।
मंगलबार राति रंगभेदको विवादका कारण पीएसजी र इस्तानबुलको खेल १४ मिनेटबाट रोकिएको थियो। त्यही खेलको बाँकी भाग बुधबार राति सम्पन्न भएको हो।