काठमाडौं– बुधबार राति सम्पन्न च्याम्पियन्स लिगको खेलमा पेरिस सेन्ट जर्मेन(पीएसजी)ले म्यानचेस्टर युनाइटेडलाई हराएसँगै समूहको प्रतिस्पर्धा बढेको छ।
युनाइटेडको मैदानमा ब्राजिलियन फरवार्ड नेयमारले दुई गोल गरेपछि पीएसजीले घरेलु टिमविरुद्ध ३–१ गोलको जित निकालेको थियो।
सोही जितसँगै समूह एचमा शीर्ष तीन टिमको अंक समान छ। शीर्षस्थानको पीएसजी, दोस्रो स्थानको युनाइटेड र तेस्रोस्थानको लाईप्जिकको समान ९ अंक छ। यी सबै टिमले पाँच खेल खेलेका छन्।
यसकारण बाँकी एक खेलमा नकआउट चरणको लागि पेचिलो प्रतिस्पर्धा हुने भएको छ। समूहमा गएराति नै सम्पन्न अर्को खेलमा लाइप्जिकले पुछारको स्तानबुललाई ४–३ गोलले हराउँदै अंकतालिकामा ९ अंक जोडेको थियो।
यता पुछारको स्तानबुल भने समूह चरणबाटै बाहिरिसकेको छ।
युनाइटेड र पीएसजीको खेलमा नेयमारले छैटौं र इन्ज्युरी समयमा गोल गरेका थिए। त्यसबीच ६९ औं मिनेट माक्र्विन्होसले गोल गरे।
त्यसअघि पहिलो हाफको ३२ औं मिनेटमा युनाइटेडका रासफार्डले गोल गर्दै खेललाई बराबरीमा ल्याए पनि दोस्रो हाफको गोलका कारण पीएसजीले जित निकालेको हो।
त्यस्तै, दोस्रो खेलमा स्तानबुलका इर्फान खावेसीले ह्याट्रिक गरे पनि जर्मन क्लब लाइप्जिकविरुद्ध जित निकाल्न पर्याप्त भएन।
जर्मन साइडका लागि युसुफ पोउलसेन, नोर्दी मुकिइले, ड्यानी ओलमो र अलेक्जेन्डर सोरलोठले समान १–१ गोल गरेपछि लाइप्जिकले जित निकालेको थियो।