सरकारको अकर्मण्यता र प्रतिपक्षको कमजोर भूमिकाले जनता निराश भए : कमल थापा 

काठमाडौं– राष्ट्रिय प्रजातन्त्र पार्टीका अध्यक्ष कमल थापाले सरकारको अदुरदर्शिता र अकर्मण्यताका कारण जनता निराश भएको बताएका छन्।

पार्टी केन्द्रीय सचिवालयद्वारा मंगलबार आयोजित अन्तर्क्रियामा बोल्दै थापाले सरकारको असफलता र प्रतिपक्षी दल कांग्रेसको कमजोर भूमिकाले जनतामा निराशा पैदा भएको बताएका हुन्। 

उनले भने, ‘जनता निराश छन्, त्यसैले राप्रपालाई बलियो वैकल्पिक शक्तिका रुपमा अगाडि बढाउन जरुरी छ।’ 

भ्रष्टाचार, बेरोजगारी र धर्मपरिवर्तनले मुलुकलाई समस्याको दलदलमा फसाएको भन्दै थापाले सशक्त र हस्तक्षेपकारी भूमिका खेल्दै अघि बढ्न कार्यकर्तालाई निर्देशनसमेत दिए।

‘हिन्दूराष्ट्र र राजसंस्थाको  आवश्यकता दिनप्रतिदिन बढिरहेको छ,’ उनले भने, ‘जनतामा परिवर्तनको चाहना भएकोले जनभावनाअनुसार पार्टीलाई नयाँ उत्साह र ऊर्जाका साथ अघि बढाउन जरुरी छ।’ 

महाधिवेशनलाई सफलतापूर्वक सम्पन्न गर्न समयसीमाभित्र कार्य सम्पादन गर्नसमेत थापाले सचिवालयको ध्यानाकर्षण गराए। उनले आन्दोलन र पार्टीको महाधिवेशनलाई सँगसँगै लैजानुपर्नेमा जोड दिएका छन्।